KUCHING, 18 Ogos: Pengawa ngatur Lumba Malaysia (SUKMA) beguna dikena ngansah bakat baru dalam industri lumba menua ngambika ulih besemekih ngagai tikas ke lebih tinggi.
Menteri Nembiak enggau Lumba, Hannah Yeoh madahka, lumba nya nyadi pelantar tumu dikena nyendiaka raban atlit mantaika bakat ba tikas antarabansa baka Lumba Olimpik.
“Siku atlit Olimpik enda datai pia aja. tikas pemujur sesiku atlit iya nya asil iya ke bebendar pengelama betaun.
“Bakat ke diansah kitai ba renggat pelilih, ba renggat nengeri baka sukma tu mih bakat ti nyadi pengarap menua ba lumba antarabansa.
“Atlit kitai ditu iya nya bakat atlit kitai ba Olimpik ila,” ku iya.
Iya mansutka jaku nya nyeruma achara bejadika SUKMA ke-21 Sarawak 2024 ti diatur di Stadium Sarawak, malam tadi.
Kelimpah ari nya, pengawa ngatur pekit lumba nasional mekuhka ngagai pemansang enggau penyedia tim bakat dalam rintai atlit menua.
Ba awak ke sama , ku Hannah, pemutus milih Sarawak nyadi tuai rumah iya nya palan pemadu manah dikena ngemujurka semangat penyerakup senutuk enggau rambai jaku pekit nya.
“Premier kala madah ngagai aku, chara pemadu manah dikena ngadaka raban nembiak ti ngembuan runding global iya nya mantaika sida ngagai sekeda prespektif.
“Lebuh aku meda ngelingi stadium tu, aku ngasaika endur tu Malaysia, atlit biak ari selampur menua digempuru ba siti endur,” ku iya.-TVS
