ANKARA, 17 Ogos: Urung 18,737 kes Monkeypox tauka raing kera udah dikenuku nyadi penyakit berampit pemadu ngirauka ati mensia mayuh diripotka nyadi ba menua Afrika kenyau ari pun taun tu tadi.
Beduduk ari penyakit ke chukup jampat berampit ba menua nya dia Gerempung Pengerai Dunya (WHO) udah meri gazet jaku tangkan ngaul pengerai antarabansa madahka penyakit tu ba tikas tangkan pemadu tinggi dibaruh undang-undang pengerai antarabansa.
Ejensi Pengerai Serakup Afrika kena Hari Enam ngenukuka penyampau nya  nyengkaum 1,200 kes dirikodka dalam timpuh seminggu.
Penyampau nya udah nambahka tiga bansa igi penyakit, keterubah dikumbai ‘Clade 1B Baru’ ke lebih mudah munuh nyawa sereta mudah berampit.
Naka diatu, 3,101 kes dikenuku enggau 15,636 kes ditemu udah diripotka datai ari 12 menua kaban Serakup Afrika, ngujungka 541 pemati tauka ikas pemati 2.89 peratus.
Nangkan ke nya, Opis Menteri Pengerai Malaysia (KKM) kena Hari Tiga tu tadi, ngenuku ke nadai kes baru ngaul Monkeypox ba Malaysia taja penyakit nya balat berampit ba rantau Afrika apin lama ke udah.
KKM nyemetak madah, penyampau semua kes Monkyepox ke dikenuku ba menua tu mengkang semilan kes, iya nya kes keterubah diripotka kena 26 Julai 2023 sereta kes kepenudi diripotka nyadi kena bulan November taun kes sama.-TVS
