BAU, 17 Ogos: Perintah Sarawak ngemendarka agih belanja sepenyampau RM55 juta dikena ngaga jalai baru ti besambungka Kampung Suba Buan ditu enggau Pasar Bau.Premier Sarawak, Datuk Patinggi Tan Sri Abang Johari Tun Openg madahka, agih nya nyengkaum projek ngaga jalai alun baru sepanjai 3 kilometer sereta sebuah jematan baru ti dianggarka beungkus RM12 juta.
Iya andal kesemua projek nya deka meri pemaik dalam timpuh panjai ngagai peranak genturung pendiau dia nyengkaum nambah penyampau nembiak di Sekula Primari (SK) Suba Buan diatu semina 65 iku nembiak.
“Nya enti nitih matak lebih mayuh nembiak ari genturung pendiau ke besemak sereta Bau laban enda jauh (ari Bau), semina 3km. Pekara ke deka digaga kitai iya nya ngaga sebuah jalai baru ungkup sekula enggau genturung rumah dia,’ ku iya.
Iya mansutka jaku nya rambau dirandau media ba pengerami Bejadika Begunan Baru SK Suba Buan ditu pagi tadi.
Nerang silik, Abang Johari madahka, pemisi jalai nya deka muka sitak baru sereta ngemansangka palan pengentap berumah baru dikena mindahka peranak genturung pendiau ke bekaul ti napi penusah ampuh bah.
“Nyadi kitai ulih muka sitak dikena ngemansangka kandang pengentap rumah delta ngambika orang genturung pendiau ulih pindah. Sida enda ibuh diau ba genturung pendiau ke mudah ampuh bah enggau sitak ke baruh.
“Kitai patut bisi perengkaguna dikena ngemindahka sida ke kandang endur lebih tinggi lalu ungkup tuju nya aku ngerunding kitai ngaga jalai,” ku iya.
Sama ngulu pengerami nya, Sapit Menteri Pelajar, Inovasyen enggau Pemansang Bakat, Datuk Seri Roland Sagah Wee Inn, Sapit Menteri Pengangkut II (Sungai enggau Tasik) ke mega Kaban Kunsil Nengeri (ADUN) Tasik Biru, Dato Henry Harry Jinep, enggau Kaban Parlimen Puncak Borneo Datuk Willie Mongin.
SK Suba Buan bepalan ba jalai alun penyambung entara Kampung Suba Buan enggau Kampung Suba Bau sereta projek nya nelan belanja sepenyampau RM24.65 juta.
Tu nyerangkung ngaga 18 bilik kelas enggau disikap 26 bilik khas baka Bilik Aum Besai, librari sekula, bilik seni enggau bilik RBT, bilik adminstrasyen lumba, bilik perubat ngeli enggau Bilik Kelas Pendidikan Khas.
Sekula tu mega bisi bilik sains, makmal komputer enggau ke bukai.-TVS
