KUCHING, 17 Ogos: Perintah sarawak deka bebendar agi mantu rayat ti nadai status peranak menua (DSITKS) dikena mantu sida ngasaika bemacham pemaik ti disediaka perintah.
Menteri Pemansang Indu, Nembiak Mit enggau Pengelantang Komuniti (KPWK) Sarawak, Dato Sri Fatimah Abdullah madahka, kenyau peminta nya dibuka berengkah 1 November 2022 nyentuk 16 Ogos 2024, raban sida udah nerima 715 peminta.
Ari penyampau nya, semina 225 peminta udah dikemendar naka ke diatu.
“Enggau pemutus aum nya, ari 306 iku (peminta), 225 dikemendar, bisi 81 ditulak.
“Entara ke ditulak pun kebuah ke lumur satu iya nya (ditemu) nguna dokumen pelesu,” ku iya.
Iya mansutka jaku nya rambau Pengawa Nyerahka Dokumen Sementara Ungkup Raban Ti Nadai Status Peranak Menua Di Sarawak (DSITKS) ditu sehari tu tadi.
Ku Fatimah, perintah nengeri deka meri dokumen sementara ngagai sesiku orang ti Nadai Status Peranak Menua Sarawak (DSITKS) ke alai dokumen nya mantu pemegai kad ngasaika pemaik baka akses pengerai enggau dikemendar besekula.
Ba pengawa nya mega, Fatimah bisi nyerahka surat penerang status peranak menua tauka setipikit DSITKS ngagai tujuh iku penerima ti ngaul nembiak mit ba baruh umur 21 taun.-TVS
