BETONG, 16 Ogos: Dua menyanak bebadi nyawa pengudah kerita perodua kancil ke ditepan seduai sereta dua agi ke bukai aksiden ba palan Pusin-P enda jauh ari Rumah Panjai Maja, Jalai Layar-Pan Borneo Betong lemai kemari.
Nitihka penerang ari Tuai Balai Bomba enggau Penyah Penusah Malaysia (JBPM) Betong, Ppgb Vincent Baling Yabi madah penusah aksiden tu ngaul sebuah agi kerita pikap (4WD), Nissan Navara.
Ku terang Vincent, bisi enam iku kaban bomba Betong dianjung ngesah penusah nya pengudah nerima kangau tasah urung pukul 3.20 lemai.
“Penusah jalai alun tu nyadi ba palan Pusin-P Rumah Panjai Maja, Jalai Layar ke Betong.
“Bisi enam iku raban bomba diuluka Pegawai Bomba Kanan Abang Jamadilhir enggau nguna FRT enggau mega ambulans EMRS ngesah palan penusah nya.
“Seninjik datai ba palan penusah sida amat meda bisi penusah aksiden nyadi ngaul dua buah kerita iya nya Perodua Kancil enggau mega Nissan Navaraba palan Pusin-P.
“Maya nya bisi iku iku tudah sida dipeda bebadi ba endur nya,” ku iya.
Vincent madah munyi nya lebuh ditelefon TVS bekaul enggau penusah bebadi ke nyadi semak Rumah Panjai Maja Betong, kemari.
Ku iya, tudah ti bebadi nya iya nya Azian Mazuan Ahmad (indai), 33 taun enggau anak iya Amieyra Madu Abdullah beumur 16 taun.
Nangkan ke nya bisi dua iku agi tudah ke bebadi semina bakal iya nya Henry Malang Tedung, 76 taun enggau Elmiera Nathsssya, 10 taun udah dianjung berubat ngagai Sepital Sri Aman.-TVS
