MUKAH, 14 Ogos: Premier Sarawak, Datuk Patinggi Tan Sri Abang Johari Tun Openg diundang bagi bekunsika senentang peneleba Sarawak ba sektor kuasa gadung di Hong Kong.
Nerang senentang pekara nya, iya madahka iya diundang bagi bekunsika senentang kuasa gadung ba renggat antarabansa ngayanka Sarawak diaku ba menua bukai dalam pemansang kuasa gadung.
“Aku diundang Hong Kong bagi bekunsika senentang chara baru dalam kuasa gadung. Dunya diatu ngelala Sarawak nengah inisiatif tu,” ku iya lebuh bejaku ba pengerami Makai Lemai Tuai Begulai enggau Rayat ditu, kemari.
Pengerami nya mega bisi digulu Menteri Pemansang Indu, Nembiak enggau Pengintu Pengelantang Komuniti Dato Sri Fatimah Abdullah, Menteri ba Opis Premier Sarawak Dato Sri John Sikie Tayai enggau Sapit Menteri Ekonomi Dato Hanifah Hajar Taib.
Abang Johari sebedau tu kala bekunsika senentang peneleba Sarawak dalam bidang ekonomi enggau kuasa ulih dikemaru, entara iya di Poland, Rotterdam, Bangkok, Singapore enggau Australia.
“Sarawak diatu diaku berindik ari pemujur Sarawak dalam ngemunka sektor kuasa gadung seraya ngenegapka penuduk kitai ba renggat global,” ku iya. – TVS
