BAU, 14 Ogos: Begunan baru Sekula Primari (SK) Suba Buan ba Bau deka dipejadika Premier Sarawak Datuk Patinggi Tan Sri Abang Johari Tun Openg kena 17 Ogos tu.
Sapit Menteri Pengangkut (Sungai enggau Tasik) Sarawak, Dato Henry Harry Jinep madahka sekula nya udah didirika ba kandang endur ti tinggi dikena nyeliahka penusah bah baka ke kala nyadi ngelama tu.
Ku iya madah palan alai sekula nya didirika ba jalai ti nyambung kandang endur entara Kampung Suba Buan enggau Kampung Suba Bau nya deka meri pengelantang ngagai pengani ka diau di kandang endur nya ambika ulih nganjung anak sida besekula diak.
“Aum ngatur pengawa bejadika SK Suba Buan enggau begunan baru ti dipindahka ari kandang endur ka suah napi penusah bah ngagai kandang endur ka lebih tinggi,” ku iya madah ba aum media pengudah tembu Aum Penyeraris Pengerami Bejadika Begunan Baru SK Suba Buan, ditu kemari.
Pengawa nirika sekula ti beungkus RM24.65 juta nya ngaul pengawa ngaga 18 unit bilik alai belajar enggau 6 unit rumah pengajar nyengkaum sekeda perengkaguna ka bukai.
Sekula nya dipadahka ulih nangkup penyampau 200 iku nembiak. – TVS
