KUCHING, 13 Ogos: Asisten Komisioner Polis (ACP), Mohd Farhan Lee Abdullah dichiri nyadi Tuai Polis Pelilih Kuching ka baru dikena nganti penuduk ACP Ahsmon Bajah ti pindah ngagai Indu Opis Polis Kontinjen Sabah.
Pengawa nyerah sereta nerima pangku pengawa Tuai Polis Pelilih Kuching ti diatur ba Diwan Mes Pegawai Kanan Indu Opis Polis Kontinjen (IPK) Sarawak nya dikemataka Komisioner Polis Sarawak Dato Mancha Ata.
Mohd Farhan asal ari Setiawan Perak, 55 taun ti sebedau tu iya nya Tuai Polis Pelilih Semporna berengkah meri servis dalam Polis Diraja Malaysia (PDRM) kenyau ari taun 1993.
Iya madahka komitmen iya deka meri servis pemadu manah ngagai komuniti kelimpah ngarapka ulih megai tanggung pengawa iya enggau manah sereta lurus.
“Aku ngarapka ulih ngetanka utai ti udah chakah diatur Tuai Polis Pelilih Kuching ka lama sereta deka ngemanahka agi pengawa tu ungkup pengelikun sereta pengelantang rayat.
“Enggau kerejasama ari komuniti lokal, aku pechaya raban IPD Kuching ulih bejalaika pengawa sida enggau pemadu manah,” ku iya madah ngagai pemberita.
Nangkan ke nya, Mancha pechaya Farhan ulih megai tanggung pengawa iya enggau manah sereta ngarapka semua raban ke bekaul ulih meri sukung penuh ngagai iya dalam meri sekalika bejalaika servis iya.
Pengerami tu mega digulu Sapit Komisioner Polis Sarawak Datuk Ibrahim Darus enggau Sapit Tuai Polis Pelilih Kuching Superintenden Merbin Lisa. – TVS
