KUCHING, 13 Ogos: Pengawa ngatur Kongres enggau Program Pemandang Ai Sedunya (WWCE) ari baruh Gerempung Ai Antarabansa (IWA) ba taun 2028 di Sarawak dipechaya deka nyadi platform pemadu manah ungkup ASEAN ngiga chara mutarka isu ai ti ditapi.
Opis Menteri Utiliti enggau Telekomunikasyen (MUT) Sarawak madahka platform ti disediaka IWA nya muka ruang ungkup menua ti bekaul ngatur pengawa berunding bekaul enggau gaya ai ti likun sereta meruan jemah.
“WWCE ti diatur ninting dua taun sekali ba mayuh bengkah palan di selampur dunya mega deka ngayanka inovasyen, teknologi enggau peneleba ti pemadu baru dalam sektor ai.
“Tetiap edisyen nyendiaka peluang dikena ngemeratka isu enggau peneleba ari raban tebangkar ari selampur dunya dikena negutka agi kaul entara dalam enggau luar wilayah,” ku MUT nengah siti penerang media ti dipansutka sehari tu.
Penerang tu dipadahka sepengudah Menteri Utiliti enggau Telekomunikasyen Sarawak Dato Sri Julaihi Narawi ngulu Pra bejadika WWCE IWA Kuching 2028 ba Montreal, Kanada kemari ke mega dikemataka Presiden IWA, Tom Mollenkopf enggau Direktor Eksekutif IWA, Profesor Kala Vairavamoorthy.
Ke mega ngulu pengawa tu Sapit Menteri Utiliti enggau Telekomunikasyen Sarawak, Datuk Dr Abdul Rahman Junaidi, Direktor Wilayah Asia enggau Oceania IWA, Dr. Hong Lidan Oceania, Presiden Gerempung Ai Malaysia, Dr. Ir. Ts. Mohmad Asari Daud enggau Chairman Gerempung Ai Malaysia Pampang Sarawak, Ts. Kelvin Kuek Hann Yin.
Taun nyin kemari, Premier Sarawak Datuk Patinggi Tan Sri Abang Johari Tun Openg madahka Sarawak dipilih nyadi tuai rumah WWCE IWA 2028. – TVS
