SONG, 12 Ogos: Program Genturung Pendiau Iru Madani patut dikerembai ngagai sitak bukai di Kapit, nyengkaum sitak Kunsil Nengeri Bukit Goram enggau Pelagus.
Menteri Kereja Raya ke mega Kaban Parlimen Kapit Datuk Seri Alexander Nanta Linggi madah, tu dikena nentuka sitak-sitak bukai bela ngasaika pemansang asil ari program nya.
“Kitai deka bejalaika projek ke sama tu nyema agi bisi taun baru tauka taun nangkan ke nya ngagai sitak-sitak bukai laban ba sitak Parlimen aku bisi tiga sitak Kunsil Nengeri.
“Nyadi serak tu kitai milih ba sitak DUN Katibas di pelilih Song tu, enti bisi taun baru aku berunidng enggau Kaban Kunsil Nengeri ba sitak Bukit Goram enggau Pelagus dini kitai deka milih, nyadi kira adil mih,” ku iya.
Iya mansutka jaku nya ba Aum Media pengudah Pengawa Nyerahka Surat Setuju Terima (SST) Ngagai Kunteriktor Projek Genturung Pendiau Iru Madani ba Genturung Pendiau Nanga Engkuah ba Begunan Baru Opis Pelilih Song.
Ku tandu Nanta, Projek Rumah Panjai Iru Madani ba Genturung Pendiau Nanga Engkuah ke beungkus RM4 juta ngaul pengawa nukar Jematan Lama, Ngaga Arung Orang Bedarat sereta Masang 100 Lampu Solar ba tiga buah rumah panjai ke diuan lebih 600 iku pengani.
Udah nya, Nanta nerang Opis Kereja Raya (JKR) Sarawak, lebih agi JKR Kapit deka matau pejalai projek dikena nentuka pemansang enggau pemujur projek nya.
Genturung Pendiau Nanga Nanga Engkuah bisi tiga buah rumah panjai bepalan urung 50 Kilometer penyauh ari Pasar Song sereta semina ulih dilawa nengah jalai sungai ke begunaka awak 3 jam.
Tiga rumah panjai ke dipasuk ungkup Projek Genturung Pendiau Iru Madani tu iya nya Rumah Assan, Rumah Radiah enggau Rumah albert Lajong ke bisi 658 iku pengani. -TVS
