BETONG, 12 Ogos: Pengelandik Bepikir Tikas Tinggi (KBAT) endang siti ari pugu besai dikemeratka perintah Sarawak nengah Pelin Strategi Pemansang Pasca Covid-19 (PCDS2030).
Kaban Parlimen Betong Dr Richard Rapu madah, perintah nengeri mega nyadi wilayah ti ngemeratka rayat ngembuan pengelandik KBAT.
“Perintah Sarawak chukup ngemeratka pengelandik rayat ke ulih nangkup pengawa ti mayuh senutuk enggau program-program ekonomi baru.
“Baka ke ditemu, Premier Sarawak udah bejadi enggau ngelanggur mayuh program ti begunaka pengereja pengawa landik lebih agi ba bidang sains enggau teknologi.
“Nya kebuah, aku madah chukup beguna kitai (anak Sarawak) nguasa bidang sains enggau matematik,” ku iya.
Iya mansutka penemu nya maya Pengerami Nutup Program Berunding Inovatif enggau Nyemetak Penyungkak Kreativiti (BIJAK) diatur Sekula Sekondari (SMK) Ulu Layar, ditu sehari tu tadi.
Ku terang iya pemansang tu deka muka mayuh peluang gawa enggau nyungkak pengelandik rayat Sarawak.
Pia mega ku iya, nengah PCDS 2030 lebih numpu ngagai Transformasyen Digital, Inovasyen, Infrastruktur Pemun, Pengangkut, Utiliti, Kuasa Ulih Dikena Baru enggau Pelajar sereta Modal Mensia Pintar.
Nya alai, iya madah pengawa ngatur Program BIJAK chukup nemban dikena nangkup peminta ngasilka pemansang runding senutuk enggau guna kemaya hari.
Ba program nya, Dr Richard bisi ngemendarka geran Projek Mit Pemansang Menua Pesisir (MRP) 2024 ngagai Gerempung Apai Indai enggau Pengajar (PIBG) SMK Ulu Layar sepenyampau RM20, 000.-TVS
