BETONG, 12 Ogos: Opis Menteri Pengangkut Malaysia nengah Opis Pengangkut Darat (JPJ) seruran sedia ngatur program advokasyen tauka licha pasal pengelikun ba jalai raya di menua pesisir.
Sapit Menteri Pengangkutan Malaysia Datuk Hasbi Habibollah madah, program nya ulih diatur dikena nambahka program advokasyen ke udah bisi diatur JPJ sereta ejensi bukai ninting taun.
“Dikena nurunka kes aksiden jalai raya nyadi udah tentu kitai endang sedia ngatur program advokasyen ba genturung pendiau di menua pesisir.
“Nya endang ulih diatur kelimpah ari nya program tambah bukai kelimpah ari program advokasyen ke seruran diatur Opis Pengangkut Darat Malaysia ba serata menua.
“Sigi ulih diatur program ke baka nya, kami endang udah sedia meri penyedar.
“Kitai nerima manah nyema bisi peminta lalu tuai raban bansa minta mih, tauka pengari rayat lokal mega ulih ngatur, nadai penanggul sigi ulih,” ku iya.
Iya mansutka jaku nya maya dirandau media pengudah Program Nutup Bantu Lisin Deriba B2 MyLisin Tikas Parlimen Betong di Diwan Masyarakat Spaoh, kemari.
Taja pia ku iya, pengawa ngatur program baka nya bepanggai ngagai peminta ari mensia mayuh sekalika nengah pengari rayat diri empu tauka tuai raban bansa.
Ku iya, raban ke bisi ati deka bekerejasama ngatur program licha pasal pengelikun jalai raya ulih berandau terus enggau Opis JPJ ba sitak diri empu.-TVS
