BETONG, 12 Ogos: Raban pengajar ba menua patut nguasa Pengelandik Bepikir Tikas Tinggi (KBAT), ku Dr Richard Rapu.
Kaban Parlimen Betong nya madah, KBAT ukai semina mantu ngemuntangka nembiak mudah meretika pekara pelajar tang mega narak sida nyadi orang ke pintar, kreatif sereta inovatif.
“Pengajar iya pugu besai penyungkak sistem pelajar menua kitai Malaysia.
“Nya alai, ba jeman globalisasyen enggau digital diatu, Pengelandik Bepikir Tikas Tinggi (KBAT) chukup beguna dikuasa semua pengajar.
“KBAT ukai semina mantu nyungkak pemereti ati raban nembiak tang mega narak sida nyadi orang ke pintar runding,”ku iya.
Iya mansutka penemu nya maya Pengerami Nutup Program Berunding Inovatif enggau Nyemetak Penyungkak Kreativiti (BIJAK) diatur Sekula Sekondari (SMK) Ulu Layar, ditu sehari tu tadi.
Ku iya, pengelandik KBAT endang pekara ke chukup diguna dalam dunya pelajar ke majak mayuh pemar.
Tandu iya, pengawa belajar jeman ke-21 (PAK21) chukup ngemeratka pengelandik komunikasyen, bekerejasama, berunding kritikal enggau kreativiti mega patut dikemeran ba pengawa belajar dalam bilik kelas.
Udah nya, iya madah nengah pengulih nguasa pengelandik nya bala pengajar deka ulih nyendiaka pendiau belajar ti lantang sereta senutuk enggau guna kemaya hari.
Dulu ari nya,program BIJAK nya digulu urung 26 iku pengajar SMK Ulu Layar diatur ba Diwan Kerangan Tapang sekula nya.-TVS
