KUCHING, 12 Ogos: Presiden Gerempung Veteran Soldadu Kor Renjer (PVTKR), Lt Kol (B) Mohd Melintang Abdullah minta perintah mutarka isu nyerariska bayar pinchin ungkup raban ti nembuka servis pengudah taun 2013.
Iya mega ngarapka pengawa nyerariska pinchin nya mega diambi kira ba pengawa madah senentang gaji Sistem Saraan Perkhidmatan Awam (SSPA) ari Menteri Besai Datuk Seri Anwar Ibrahim kena 16 Ogos 2024.
“Isu tu agi bedau teputarka kenyau ari taun 2014. Mayuh sida ti meri servis lebuh jeman menua agi siga baka konfrontasi enggau angat 2 (1946 nyentuk 1990) enggau sida ti beumur entara 59 nyentuk 99 taun sereta bisi mega ka udah ninggalka kitai,” ku iya.
Iya munyi nya ba Pengerami Makai Lemai PVTKR sereta bejadika Bup Agi Idup Agi Ngelaban beserimbai enggau Hari Bujang Berani 2024, malam tadi.
Pengerami nya bisi digulu Sapit Menteri Besai Datuk Seri Fadillah Yusof.
Ku iya madah Sarawak nempa raban elit iya nya Sarawak Renjer enggau bujang berani ti tebilang ti udah ngemegahka menua Bumi Kenyalang tu.
Nangkan ke nya ku iya madah urung 17,000 iku veteran enda nyengkaum kedu polis ka mayuh udah berambunka nyawa nyaga sereta ngetanka menua Sarawak.
“Kepenudi Perintah Besai meri pengaga ati ngagai raban soldadu ti udah berambunka nyawa nengah bayar sekali beri beungkus RM500 ba taun 2021,” ku iya.
Hari Bujang Berani 2024 renggat nengeri Sarawak diatur gerempung veteran enggau ngatur pengawa betemu begulai enggau kaban sida ba sekeda pelilih menua.
Pengerami ti diatur dikena ngenang jasa raban Bujang Berani menua dalam ngetanka pengelikun menua.
Ke penerang, Gerempung Veteran Soldadu Kor Renjer (PVTKR) ti ditumbuhka ba taun 2015 diatu bisi 1,150 iku kaban. – TVS
