SPAOH, 11 Ogos: Raban Bank Betanam Betupi Malaysia Berhad (Agrobank) Pampang Sarawak dipinta anang betangguh bejalaika baru operasyen sida ba Spaoh.
Sapit Premier Sarawak Datuk Amar Douglas Uggah Embas madah, nadai kebuah pekara nya ditangguh laban palan enggau wang chengkeram ungkup bank nya beoperasyen udah dibayar taun 2021.
“Laban ke nyadi pengari rayat aku chukup berasai asa, nyadi aku ngarap sapa ke ngatur pengawa tu patut bejalaika pengawa enggau lengkas laban perengkaguna tu chukup beguna ngagai rayat di Spaoh.
“Anang betangguh agi laban palan udah bisi lalu rayat ditu chukup begunaka bank.
“Aku ngarapka raban Agrobank mutarka penanggul tu laban tu ukai pampang ke baru ditu laban udah kala dibuka ba Spaoh suba,” ku iya.
Iya mansutka jaku nya maya Pengerami Nutup Program Semina Penyulut SPM 2024 diatur SMK Spaoh, kemari.
Ku iya, randau begulai enggau bala pegawai Agrobank pasal pekara nya udah diatur tang apin bisi bekau diadu.
Nya alai, iya ngarapka raban Agrobank ulih lengkas mutarka penanggul bekaul atur muka baru pampang Agrobank di Spaoh ke pemaik mensia mayuh.-TVS
