SPAOH, 11 Ogos: Insentif penyampau RM2,000 deka diberi ngagai nembiak Sekula Sekondari (SMK) Spaoh ti nyulut tauka bulih pemutus 10A ba peresa Sijil Pelajaran Malaysia (SPM) 2024.
Sapit Premier Sarawak Datuk Amar Douglas Uggah Embas madahka, insentif nya dikena meransang raban nembiak ba sekula nya ngambika ransing agi ngulihka pemutus ti nyulut ba peresa nya.
“Siti pekara ti dikemeratka iya nya ngambika anak kitai terus bulih pemujur.
“Pengidup dudi hari nya ditentuka kita (empu), baka aku tu nganti aja, udah pukul 6 (lunggar umur) tang ungkup kita (rebak) ti baru deka berengkah baka buah rian, (mesti belajar bebendar) baru niki.
“Nya alai iya ke dipebasa (bala pengari rayat) udah nyendiaka mayuh bengkah program,” ku iya.
Uggah ke mega Kaban Kunsil Nengeri (ADUN) Bukit Saban bejaku munyi nya rambau Pengerami Nangguh Seminar Penyulut Spm 2024 diatur Gerempung Bini-Bini Menteri enggau Sapit Menteri Sarawak (SABATI) ba Diwan Sinaran SMK Spaoh.
Tandu iya, iya enggau Kaban Parlimen Betong Dr Richard Rapu deka seruran sedia mantu sekula ari sukut belanja.
Nya alai iya madahka, raban nembiak sekula patut nemu nguna peluang ti bisi disediaka perintah ngambika ulih terus mujur dalam bidang pelajar, tebal agi dalam bidang teknologi digital.
Ungkup rikod, bisi 177 iku nembiak SMK Spaoh deka ngambi peresa SPM 2024.
Ari penyampau nya, bisi 19 iku iya nya dalam Aliran Sains Tulen sereta 158 iku agi dalam Aliran Sains Sosial.
Ba peresa SPM 2023, SMK Spaoh mujur ngerikodka 12 iku nembiak sekula bulih pemutus peresa ti nyulut enggau dua iku ari sida bulih pemutus 9A enggau 8A.-TVS
