SPAOH, 11 Ogos: Mensia mayuh di Spaoh endang chukup randaka servis Agrobank dibuka baru ba pelilih nya.
Penghulu Legam Unggot madah, menua Spaoh diatu majak mansang sereta penyampau orang ke bedagang enggau betanam betupi pan majak nambah nyadi endang patut servis bank nya dibuka baru.
“Aku endang nyukung penemu Datuk Amar Douglas Uggah Embas laban menua Spaoh diatu benung ranchak dikemansang.
“Nyadi rayat ditu mega majak mayuh nyadi orang bedagang enggau orang betanam betupi pan majak mayuh.
“Nya alai, aku setuju endar enti servis Agrobank ditumbuhka baru di Spaoh,” ku iya.
Udah nya, ba penemu pengajar Felix Angkau William Barang pemisi servis Agrobank di Spaoh tentu iya deka ngemuntangka pengawa sida bekaul enggau bank lalu enda ibuh jauh nurun ke pasar Betong.
“Laban pejalai ke Betong umbas iya penyauh nyadi nyema bisi pampang bukai ATM di Spaoh nyadi nya deka meri pemaik ngagai kami,” ku iya.
Seduai iya mansutka timbal penemu nya pengudah tembu Program Seminar Penyulut Nembiak SPM 2024 di SMK Spaoh, kemari.
Ke penerang, sebedau tu Agrobank kala dibuka ba Begunan Opis Pelilih Spaoh tang servis nya diketu laban meri awak ngagai proje ngaga opis pelilih Spaoh ke baru.-TVS
