KUCHING, 10 Ogos: Pengawa matau sereta penerang bekaul enggau Lumba Malaysia (SUKMA) ke-21 Sarawak ulih diakses enggau mudah nengah palan operasyen enggau aplikasyen SUKMA XXI.
Menteri Nembiak, Lumba enggau Main sereta Pemansang Orang Dagang (MYSED) Sarawak, Dato Sri Abdul Karim Rahman Hamzah madahka, palan operasyen SUKMA XXI berengkah beoperasyen kena 9 Ogos nyentuk 28 September dikena ngemudahka atur pengawa ti ngaul lumba SUKMA enggau Para SUKMA Sarawak 2024.
“Command Centre tu mega ulih mantu Sekretariat SUKMA matau pejalai SUKMA enggau Para SUKMA sereta matai isu ke nyadi ba semua 50 veneu dalam semilan bagi menua di nengeri sarawak, veneu pekit ba semilan bagi menua, sepanjai timpuh sukma enggau Para SUKMA,” ku iya.
Tandu karim, ba lumba sukma serak tu, aplikasyen SUKMA XXI dikemansangka dikena ngemudahka raban atlit enggau mensi mayuh ngulihka penerang sereta berita pemadu baru nyengkaum pemutus enggau rikod midul diulih sepanjai lumba SUKMA.
“Berindik ari SUKMA iya nya siti lumba ke beguna, aku ngarap enti ulih semua rayat sarawak bantai turun aplikasyen nya ngambika kitai nemu pekara ke nyadi ninting hari enggau berapa penyampau midul ke diulih,” ku iya.
Berebak enggau nya, dikena ngangkatka semangat lumba, Gerempung Pemberita Bagi Menua Kuching (KDJA) mega bisi ngatur Pekit Fotografi enggau video SUKMA ke-21 ti deka diatur berengkah 12 nyentuk 24 ogos 2024.
Pekit dibagi ngagai tiga kategori fotografi tebuka, fotografi nembiak sereta videografi ti nyendiaka perais sepenyampau RM15,250.
Kelimpah ari nya, dikena meri basa ngagai tangkup pengawa raban media ti gawa sepanjai lumba SUKMA, siti pekit foto enggau artikel pemadu manah mega bisi diatur berengkah 16 nyentuk 25 Ogos tu.
Foto enggau artikel ti pemadu manah deka mai pulai duit RM100 ninting hari.-TVS
