BETONG, 10 Ogos: Mensia mayuh di Betong dilalau seruran nyaga pemanah ulah sereta meri kerejasama ngagai raban atlit ke bisi ngambi bagi sekumbang Pekit Angkat Berat Lumba Malaysia (SUKMA) Sarawak 2024.
Residen Bagi Menua Betong Richard Michael Abu Nawas madah, pekara nya chukup beguna dikena nyaga pemanah nama pelilih Betong ke endang dikelala pengerah sereta mentas enggau temuai.
“Minta kerejasama semua peranak Betong ngelaluka penatai bala temuai kitai (atlit enggau pegawai) ke datai enggau nyaha ari segi pemeresi enggau ke bukai.
“Penyiru nya beguna amat tanya sida lebih sida datai lalu kelaluka sida enggau mua ke manis. Nyema sida bisi begunaka sebarang bantu enggau betanyaka pekara pasal Betong saut sida enggau manah,” ku iya.
Iya mansutka jaku nya pengudah tembu aum bekaul enggau Lumba Malaysia (SUKMA) Sarawak 2024 ba Opis Residen Betong, empai lama.
Ku iya, raban pedagang lebih agi sida ke bejual pemakai patut seruran ngemeratka pemeresi enggau kualiti pemakai ke dijual sida.
Tandu iya, mensia mayuh mega diperansang sampal datai meri sukung penuh ngagai tim angkat berat Sarawak.
Pekit Angkat Berat SUKMA Sarawak 2024 deka diatur ba Diwan Lumba Tan Sri Datuk Amar Stephen Kalong Ningkan Betong lalu bisi 215 atlit enggai pegawai deka ngambi bagi ti deka berengkah besemekih 17 haribulan lapan tu.-TVS
