SARATOK, 10 Ogos: Kaban Kunsil Nengeri (ADUN) Krian Friday Belik ngarapka mayuh agi projek ngemanah tauka ngaga baru sekula ke udah repuk di sitak kunstitusyen iya.
Ku iya, pekara nya chukup beguna laban naka tu semina tiga sekula ari 28 buah sekula ba sitak DUN Krian udah dikemendar digaga baru.
“Kitai endang ngarapka mayuh agi projek ngemanah enggau ngaga sekula ba DUN Krian laban ari 28 buah sekula primari ke bisi diatu, tiga udah dikemendarka.
“Nyema ulih diperundingka baka ke udah diperambu ba Aum DUN ke udah kitai bisi minta ngambika semua sekula ba sitak DUK Krian tu dikemanah enggau diberi agih belanja,” ku iya.
Friday mansutka penemu nya pengudah Pengawa Nasih Tanah Perambu Ngaga Baru Sekula Repuk di Sekula Primari (SK) Nanga Atoi Krian, ditu kemari.
Ku terang iya, pekara nya patut dikemerat laban nyau deka semua sekula primari enggau sekondari ba Krian ba kategori sekula ke udah kelalu repuk.
Dulu ari nya, Projek Pemansang Ngaga Baru SK Nanga Atoi dikemendarka ba taun 2021 lalu timpuh ditaga tembu Januari 2026.
Skop projek ke beungkus RM2.8 juta nya mungkur pengawa ngaga dua blok bilik kelas kategori A, sebuah blik bilik sains kategori B enggau sebuah blok agu kategori B.
Tiga buah sekula ke udah dikemendar perintah besai deka digaga baru iya nya SK Orang Kaya Temenggung Tandok, SK Babang enggau SK Nanga Atoi.
Sama bisi datai ngulu pengawa nya Injinir JKR Bagi Menua Betong Jason Ng Boon Tuan , Penulung Injinir Bagi Menua Betong Ir. Ts. Muhammad Kashral Kamalmirza sereta ke bukai.-TVS
