PAPAR, 4 Ogos: Kerita ari menua luar semina dikemendar ngisi minyak diesel enda ngelui 20 liter di stesyen minyak Sabah enggau Sarawak ke dibuka dalam radius 30 kilometer ari garis antara menua Brunei tauka Indonesia.
Menteri Dagang Dalam Menua enggau Kos Pengidup, Datuk Armizan Mohd Ali madah lepas ari radius 30 kilometer nya, peranak menua luar ulih meli nitihka diguna tang mesti diisi dalam tangki kerita sida aja.
Pengudah ngulu program Bejual Rahmah enggau Program Battle of Ethnic di Papar, Sabah, malam Hari Enam.
Armizan madahka bepelasarka Atur Nyaga Stok Dibaruh Tusun 12A, Atur Nyaga Stok 1974 bekaul Tagang Nyual Diesel enggau Petrol RON95 ngagai kerita ke ngena plet menua luar.
Atur tu udah digazet kena 17 June 2022.
Ku terang iya, taja perintah nyaga hak rayat ngambi ngasaika subsidi, tang ba maya ke sama perintah beratika penatai temuai luar ngagai Sabah enggau Sarawak laban sida mantu nyungkak ekonomi lokal.
“Luar radius 30 km nya sigi nadai tagang tang kebendar ungkup nyual ngagai kerita-kerita menua luar, nyengkaum ngagai bala temuai ari Brunei.
“Nama utai ke nyadi kebendar bisi saru ba sekeda stesyen minyak, laban dikenangi sida maya ‘viral’ tagang bekaul nyual diesel ngagai kerita menua luar,” ku iya.
Iya meri timbal bekaul enggau siti video dikerembai nengah media rama bekaul enggau konvoi kerita temuai ari Brunei ke nyereta achara ‘off-road’ di Sarawak.
Ba posting nya, raba nya diripotka betapi enggau penanggul ngisi diesel laban stesyen mintak ke dipansa sida enggai nyual minyak diesel ngagai kerita menua luar.
Ku terang Armizan, atur ngisi minyak maksimum 20 liter diesel tu mega dikena ba Semenanjung Malaysia dalam radiyus 50 kilomter ari garis antara menua Thailand enggau Singapore.
Taja pia, iya nyemetak madahka kerita menua luar enda ulih sekali ngisi minyak petrol RON95 ke ngundan subsidi ungkup rayat Malaysia.
Nyadi rayat menua luar semina dikemendar meli petrol RON97 ungkup kerita diri empu.-TVS
