KUCHING, 3 Ogos: Gerempung Orang Bengal Sarawak (SSD) mesti seruran bekerejasama enggau negutka kaul ti rat enggau perintah nengah Opis Menteri, ketebal agi ba dalam sekeda aktiviti ke bisi diatur.
Menteri Pemansang Indu, Nembiak Mit enggau Pengelantang Komuniti Sarawak, Dato Sri Fatimah Abdullah madahka, kerejasama ke manah ngemudahka bantu enggau turu diberi ngagai gerempung nya dikena sida ngatur aktiviti ke bekaul.
“Nengah Opis Menteri kami, mandangka perintah sigi nyukung pekara ke ngaul siku-siku orang ti begunaka bantu khas enti kitai nyebut pasal sengkaum rama.
“Reti tu iya nya kami deka nentuka semua kita disengkaum enggau diberi sukung ke nemban sereta nya pekara ke patut dikenatika kami enti deka ngemujurka aspek nya,” ku iya.
Ku iya madah, Perintah Sarawak sigi semampai nyukung raban ti begunaka bantu khas ngambika semua rayat enda ngira renggat ulih ngasaika pengelantang ke sama, lalu nya ngemeratka aspek sengkaum rama.
“Semua rayat Sarawak sekalika kurang penatai pemisi tauka pemisi mesti ngasaika diri enda dikelaung dalam pemansang menua tu, nengeri tu enggau meri peluang sereta sukung ke betul.
“Nya mih pekara ti deka dikemeratka, tang kita mesti nyukung, semak enggau kami, ku iya maya bejaku pengudah nerima penemuai meri basa ari Raban Gerempung Orang Bengal Sarawak (SSD) ba Begunan Baitulmakmur 2 di Kuching, Hari Lima tu tadi.
Berebak enggau nya, Fatimah ngelalau rayat Sarawak meri sukung enggau ngambi bagi dalam program Belanda Sengian tauka Silent Run 4.0 Kuching ti deka diatur ba Kaunsil Mengeri Besai Kuching Selatan (MBKS) kena 24 November 2024 sereta naga penyampau 1,500 penyereta ngulu program nya.
Entudika nya, di Miri deka diatur ba Marina Parkcity kena 8 September 2024 ke mega naga penyampau 1500 penyereta.
Sebedau nya, raban SSD udah mujur ngatur program Silent Run 4.0 Sibu di Sibu Town Square kena 5 Mei 2024 ke udah ti ngaul 649 iku penyereta, ngelui taga asal iya nya 500 iku penyereta.-TVS
