BETONG, 3 Ogos: Pemujur nyadi champion Pekit Olahraga Kaunsil Lumba Sekula-Sekula Bagi Menua Betong (MSSB) Renggat Ke-20 kena Hari Lima tu tadi endang chukup ngemegahka Sekula Sekondari (SMK) Saratok mulaika baru status nyadi sekula kering ba bidang lumba di Betong.
Prinsipal SMK Saratok Beritin Empawi madah pemujur mulaika baru gelar champion nya deka nyadi peransang ngagai raban sekula terus bebendar nempa pemujur ba bidang lumba dudi hari.
“Kitai chukup berasai gaga laban ulih mulaika baru trofi ke telepas taun nyin kemari nyadi kitai udah nunjukka SMK Saratok agi kering enggau agi nyadi jaguh ba MSSB di Betong tu,” ku iya.
Nya alai, ku Beritin iya meransang raban jurulatih enggau atlit SMK Saratok terus bebendar agi ba pekit ti deka datai.
Iya mansutka timbal nya pengudah tembu pengawa nutup Pekit Olahraga Kaunsil Lumba Sekula-Sekula Bagi Menua Betong (MSSB) Renggat Ke-20 ba Kompleks Lumba Betong, kemari.
Penuduk lumur dua enggau ketiga dipenggi SMK Saint Augustine enggau SMK Saribas.
Berebak enggau nya, maya dirandau Tuai Jurulatih SMK St Augustine Ahmad Nooraffif Mohd Nasir madah pemuntan ngetanka gelar champion serak tu diasai ukai jereki ngagai kontinjen sekula sida.
Taja pia, iya berasai tepantup ati enggau komitmen ke udah ditunjukka bala pegawai enggau atlit sekumbang pekit nya diatur.
Ku iya, kontinjen sida mujur nyapai saran midul ke udah ditetapka raban pengatur pengawa sekula ungkup pekit serak tu.
SMK Saratok sebedau tu kala bulih gelar champion MSSB penyuah semilan kali kenyau taun 2008 nyentuk 2016 sebedau ke alah ngagai SMK St Augustine ba Pekit MSSB renggat ke-19 taun nyin kemari.
Udah nya, ba kategori zon ngemataka Zon Roban mujur ngetanka gelar champion ditangkan Zon Saratok lumur dua enggau Zon Debak ba penuduk ketiga.-TVS
