KUCHING, 3 Ogos: Perintah Sarawak deka meri insentif ngagai atlit nengeri tu ke mujur bulih midul emas ba Pekit Lumba Malaysia (SUKMA) ke -21 ti deka berengkah 17 Ogos 2024 tu.
Premier Sarawak, Datuk Patinggi Tan Sri Abang Johari Tun Openg madahka, penyampau insentif ti deka diberi nya semina deka dipadah pengudah aum begulai enggau Kabinet Perintah Nengeri udah tu ila.
“Perintah Sarawak sigi ka meri insentif, aku deka baum enggau kabinet kitai pasal meri insentif ngagai sida (atlit lokal) ke bulih midul emas.
“Taja pia, aku bedau ulih nyebut diatu, enggaika nengeri bukai enda nyamai asai. Kitai sigi ka meri, enti enda sama penyampau, nya kira manah agi,” ku iya ba rambau Program Nyerahka Menira Ibu Pertiwi ngagai Tuai Kontinjen SUKMA Sarawak ba sebuah hotel di Kuching ditu, sehari tu tadi.
Kelimpah ari nya, Abang Johari nerangka, atlit Sarawak ti bulih pemujur dalam pekit nya ukai semina ngangkatka penampak nama wilayah tu dalam bidang lumba enggau main, tang mega ngangkatka penampak nama menua tu.
“Enti nyema bala atlit kitai mujur, kering, kitai ukai semina ngangkatka menira Ibu Pertiwi aja, tang ngangkatka Jalur Gemilang.
“Ambika chunto, baka Bonnie Bunyau Gustin ti menang di Komanwel, menira Jalur Gemilang ditikika enggau disukung Ibu Pertiwi ba belakang iya,” ku iya.
Berindik enggau nya, iya mega madahka Perintah Sarawak udah ngungkupka belanja nganjung sekeda atlit ti ngaul sekeda achara lumba enggau main ke menua luar ngambika sida ulih negapka agi penyikap kontinjen Sarawak.
“Bisi sida bejalaika latih di Korea, ke menua Thailand, ba dini-dini endur sida deka belatih sigi dikemendarka, tang mesti nitihka standard baka Korea,” ku iya.
SUKMA edisyen ke-21 tu, Sarawak naga deka ngulihka 70 midul emas, lalu pemujur nya ulih nentuka juluk Sarawak nyadi champion ulih dijapai.-TVS
