KUCHING, 3 OGOS: Sarawak netapka taga deka ngatur Pekit Kriket Renggat Antarabansa ngaul Trofi Dunya Kategori Indu Baruh 19 Taun, Kaunsil Kriket Antarabansa (ICC) ti dijangka diatur dalam taun 2025.
Menteri Nembiak, Lumba enggau Main enggau Pemansang Pedagang Sarawak, Dato Sri Abdul Karim Rahman Hamzah madahka, taga nya digaga laban Sarawak diatu udah bisi padang kriket keterubah di Borneo.
“Aku bisi dipadah senentang kriket di Malaysia dalam dunya, sida ba penuduk ke-24, lalu tu ngayanka main tu sigi dikerindu enggau aku meda di Sarawak, main kriket tu benung ngerembai.
“Pemisi padang kitai empu ba ditu, ulih mantu ngangkatka main nya. Pia mega, aku bisi dipadahka pasal Gerempung Kriket Malaysia enggau Gerempung Kriket Sarawak benung senaka ulih deka ngatur Pekit Kriket Antarabansa, dijangka dalam taun baru,” ku iya.
Kelimpah ari nya, iya nerangka perengka guna dikena lumba enggau main nya mega patut diberi perati.
“Nya alai, enti kitai bisi peluang nyadi pengatur, nya ukai semina begunaka padang aja. Pia mega, perengkaguna bukai baka bilik alai begari, agu sereta ke bukai mesti bisi.
“Nya mih kebuah kitai diatu benung meda enggau aku deka ngatur udah SUKMA tu ke alai endur mensia mayuh ke meda, begunan ni ke mesti digaga ngimbai padang kriket tu ngambika endur nya kurang lebih baka stadium,” ku iya.
Karim mansutka jaku nya pengudah Program Ngelanchar Tumu Sarawak Cricket Oval ba Kompleks Lumba enggau Main Petra Jaya, ditu kemari.
Iya nerangka, pekit ti diatur hari lima nya nyadi pekit ke besejarah laban padang kriket nya keterubah digaga di Pulau Borneo.
“Naka ke diatu, aku enda nemu penyampau anggar kos ke deka dikena, tang sigi manggai bejuta ringgit. Enti enda salah aku.
“Tang, enda ngawa laban nya sigi pulai ke penguntung laban enti kitai deka ngemansangka lumba enggau main, ketebal agi baka ke disebut aku tadi, Padang Kriket keterubah di Borneo. Kitai udah nempa sejarah baka ke sehari tu.
“Nya alai aku madahka raban ke bemain sehari tu dibai masuk raban ari Jakarta, indu ari Jakarta belaban enggau raban ari Sarawak. Tu pekit ke udah nempa sejarah,” ku iya.
Tandu iya, raban bukai nyengkaum peribit ti bisi ati deka bekerejasama enggau perintah Sarawak ngaga mayuh agi padang kriket di wilayah tu endang disukung enggau dikelaluka.-TVS
