BETONG, 3 Ogos: Kaban Parlimen Betong Dr Richard Rapu madahka, pengawa ngatur Pekit Olahraga Kaunsil Lumba Sekula-Sekula Bagi Menua Betong (MSSB) ulih nerenak enggau ngembing nembiak sekula seruran menatika chara enggau budaya pengidup ti manah ke pengerai.
Maya Nutup Pekit Olahraga MSSB Renggat Ke-20 ditu kemari iya madahka, program nya mega manah amat dikena nambahka tikas pemujur akademik nembiak seraya nempa nembiak sekula ke regas ari aspek mental sereta fizikal.
“Pekit tu mesti dipeda dalam skop ke lebih besai nyengkaum nyadi penyungkak dikena bedajaka gaya pengidup ke gerai ngagai tebak biak nengah aktiviti lumba enggau main ti nyadi entara pantar ke manah dikena ngadaka nembiak sekula ke regas sekalika ari aspek fizikal enggau mental,” ku iya.
Nangkan ke nya, Dr Richard nerangka, pengawa ngatur aktiviti lumba enggau main baka nya mega bisi daya nempa nembiak sekula ti ngembuan ulah ke mereti, betanggungjawap, bisi disiplin ke tinggi, identiti sereta nyadi bepengulih nyadi tuai ke manah.
Tandu iya, ulah ke mereti mesti diterenak dalam semua pekit tauka program lumba enggau main ke bisi diatur, laban nya tau ngidupka agi semangat beserakup ngaul nembiak sekula.
Bisi 1554 iku atlit enggau pegawai ari 14 buah sekula sekondari enggau primari ngambi bagi dalam pekit Olahraga MSSB serak tu ti diatur Sekula Sekondari (SMK) Saratok.
Pekit Olahraga nya diatur pengelama lima hari berengkah ari 28 Julai lalu ngemataka 32 rikod baru mujur ditempa raban atlit.-TVS
