SIBU, 3 Ogos: Patut mayuh agi belanja diberi Perintah Besai ngagai Kaban Parlimen dikena mantu ngemanah perengka ke chukup beguna ba sekula.
Sapit Menteri Pengerai Mensia Mayuh, Pengawa Berumah enggau Perintah Lokal Datuk Michael Tiang Ming Tee madah, tu beduduk ari sektor pelajar agi dibaruh autonomi Perintah Besai.
Ku terang Tiang, iya ke nyadi Kaban Kunsil Nengeri (ADUN) semina ulih mantu bejalaika enggau ngemanah sekeda perengkaguna ke udah bisi ba sekula.
“Aku ngarap Kaban Parlimen ulih nyendiaka mayuh agi belanja ari Perintah Besai dikena mantu ngemanah sekula ke pengelantang bala nembiak,” ku iya.
Micheal Tiang ke mega Kaban Kunsil Nengeri (ADUN) Palawan mansutka penemu nya pengudah ngabas Taba Projek Ngemanah Perengkaguna ba Sekula Sekondari (SMK) Kampung Nangka, ditu kemari.
Ku iya, mayuh sekula ba sitak DUN Pelawan patut dikemanah baka bala ngaduka agu, arung pejalai kaki, atap enggau ke bukai.
Michael Tiang madah diri udah minta kunteriktor ngemanah dinding begunan ke udah merekah sereta besemaya mantu nembuka sekeda projek ba semua sekula ba kunstitusyen iya.
Nangkan ke nya, iya madah diri agi mansik nyangka deka ngaga gelanggang ‘pickleball’ tauka sekeda trek joging ba mua sekula ngambika meri pemaik ngagai nembiak enggau mensia mayuh.-TVS
