PAKAN, 3 Ogos: Atur khas muka pengawa puang nyadi pengajar ke benung dipejalaika perintah endang siti langkah rapat ke manah ungkup anak Sarawak bulih peluang gawa sereta ngajar nembiak sekula di wilayah tu.
Kaban Kunsil Nengeri (ADUN) Pakan, Tan Sri William Mawan Ikom madahka, nya mega chara dikena mutarka penanggul suntuk pengajar, ketebal agi di kandang menua ulu enggau menua pesisir Sarawak.
“Sida tu ulih gawa ngajar ba sekula di menua psisir sereta ngesan tangkup pengawa besai dalam pemansang sida.
“Dua pekara tu beguna amat. Nya alai, berindik ari atur khas tu, ba penemu aku sigi langkah rapat pemadu manah dikena ngerapitka takah peminta pengajar tambah ba kandang menua nya,” ku iya.
Iya mansutka jaku nya pengudah ngulu Program ‘Santai Bersama Rakyat’ ba Rumah Panjai Dressa Matu, Jalai Entabai, ditu kemari.
Mawan ke mega penyanding penemu ba Opis Premier Sarawak nerangka, servis pengajar ba menua pesisir sigi diguna amat dikena nentuka nembiak ba endur nya bulih penemu, sereta enda tinggal tauka dikelaung ari arus pemansang.
Tandu iya, nembiak ke udah graduet bachelor degree sekalika bisi tauka nadai diploma sereta degree bidang pelajar mesti nguna manah peluang nya ngisi peluang gawa sereta pangku pegawa ke bisi dibuka nya.
Menteri Pelajar, Inovasyen Enggau Pemansang Bakat, Dato Sri Roland Sagah Wee Inn, apin lama bisi madahka senentang atur khas ba baruh Opis Menteri Pelajar Malaysia (KPM) sereta Komisyen Servis Pelajar (SPP) bisi muka urung 1,243 pengawa puang nyadi pengajar ungkup nengeri Sarawak.-TVS
