BETONG, 1 Ogos: Sukung penuh ari mensia mayuh ke diau besemak di Betong deka nyadi peransang ke chukup beguna ngagai Tim Angkat Berat Sarawak dalam ngulihka midul ba Pekit Lumba Malaysia (SUKMA) 2024 ke diatur berengkah 19 nyentuk 23 Ogos tu ila ba Diwan Lumba Tan Sri Datuk Amar Stephen Kalong Ningkan di Betong.
Tuai Jurulatih Tim Angkat Berat SUKMA Sarawak 2024 Jonathan Patrick madah, pemisi tim panjung dibai Komiti enggau Pengelikun Genturung Pendiau (JKKK) Kampung Melayu Betong maya pekit diatur ila deka meri pengelebih enggau peransang ngagai bala atlit angkat berat bebendar nyapai midul.
“Naka tu manah amat sukung baik nya maya belatih chukup mayuh penyukung, balat amat meransang.
“Ba sitak Betong tu, pia mega bisi sukung penuh ari pengari rayat kitai. Naka tu kitai tepantup ati nyangka kitai ulih nyapai juluk nya.
“Naka tu, empai kala bisi ba genturung pendiau baka tu, kitai bisi tim panjung diatur raban genturung pendiau empu,” ku iya.
Iya madah munyi nya pengudah tembu Pengawa Belatih Tim Angkat Berat SUKMA Sarawak 2024 di Betong, kemari.
Ku iya madah diri chukup andal juluk bulih dua midul pirak enggau tiga midul engkeraju deka tejapai asil pemanah rikod ke dijapai sekumbang belatih ngelama tu.
Tim Angkat Berat Sarawak bisi udah ngempuruka 16 atlit iku atlit diau ba Betong kenyau ari pun bulan nyin kemari lalu tembu kena 16 Ogos tu ila, iya nya tiga hari sebedau haribulan pekit berengkat.
Urung 200 iku atlit ari selampur menua deka ngambi ba pekit angkat berat serak tu.
Rikod pemadu manah dijapai Tim Angkat Berat Sarawak iya nya ba taun 2018 ba Perak iya nya bulih dua midul emas, lima midul pirak enggau enam midul engkeraju.-TVS
