SPAOH, 1 Ogos: Asil ari jaku peransang Sapit Premier Sarawak Datuk Amar Douglas Uggah Embas, ngujungka Rentap Biju 61 taun diatu udah mujur nyadi siku ari pengeluar manuk penakan kampung.
Iya udah mekuhka pengawa nupi manuk tu kenyau ari dua taun ke udah sereta udah ngasilka penatai pemisi manggai RM3, 000 sebulan.
Keterubah iya baru ngaul diri ba pengawa nya suba, iya madahka diri nangi laban nadai ngembuan penemu enggau latih sereta peneleba khas dalam bidang nya.
“Maya terubah iya suba, aku sigi minat ba (pengawa nupi) manuk tu.
“Pengudah ninga jaku peransang ari Datuk Amar Douglas Uggah Embas lebuh iya ke bejalai ngagai menua kami ditu iya endang ngansak kami ditu mekuhka pengawa betanam betupi dikena nyungkak penatai pemisi diri ba rumah panjai.
“Nya alai, tu mih terubah aku terus nguji taja mula-mula suba bisi berasai takut.
“Aku berengkah nupi enda mayuh iya nya 300 iku (manuk) ari penyampau nya dia aku meda utai tu ulih digaga (bisi jalai nyungkak pemisi),” ku iya.
Iya bejaku munyi nya ngagai pemberita ba ladang ke diempu iya semak rumah panjai sida di Penom, Betong.
Ku tandu iya madah, kelimpah ari peminta tinggi ba makit lokal, chara nupi manuk tu mega enda begunaka modal ke besai laban manuk tu semina dilengka pia aja bibas ngiga pemakai kediri ba luar kerungan.
“Laban kami tu kira iya ‘freelance’ reti dilepaska kami laban enti tua meri iya kurang pemakai iya nemu ngiga pemakai kediri.
“Udah nya, laban aku ngasai diri mayuh ubi suba ambi kami buah ubi kena kami meri iya kekadang meli ga mulong nyadi pemakai manuk,” ku iya.
Ku iya madah, iya diatu udah berengkah nyingkang nyadi siku ari orang ke eksport dagin manuk penakan kampung berindik ari projek padang bilun menasan pandak (Stolport) di Bebuling nyau deka tembu.
Kelimpah ari makit lokal, asil nupi manuk iya diatu majak nerima peminta ari pemeli ti ngangkat terus sereta pedagang restoran di pelilih Bintangor enggau Sarikei.
Pia mega, manuk tu dijual nitih rega makit ungkup manuk idup manggai RM18 sekilogram, ku iya.-TVS
