KUCHING, 1 Ogos: Semua rayat Sarawak dipinta sama ngemujurka inisiatif ‘Siti Rumah Siti Jalur Gemilang’ nengah penemu dibantaika Opis Menteri Komunikasyen nyerumba Ngintu Bulan Kebangsaan enggau Ngitau Jalur Gemilang taun tu.
Direktor Opis Pemadah (JaPen) Sarawak Helmy Hamid madah, penyereta ari semua renggat komuniti di Sarawak beguna laban inisiatif tu betuju nyungkak semangat sayauka menua enggau nyadi kelai bebasaka jasa ketuai dulu suba nyapai merdeka.
“Semua rayat sekalika nya ba mengeri enggau menua pesisir ditesau sama ngemujurka program Ekspresyen ke bela diatur ba genap pelilih menua ditangkan bela ingatka haribulan ke chukup besai reti nya dalam sejarah penumbuh menua,” ku iya madah ngagai Bernama.
Iya madah munyi nya ba Pengerami Bejadika Bulan Kebangsaan enggau Kitau Jalur Gemilang Renggat Sarawak ti diatur ba Palan Aum Beso’ CIDB Kuching yahon sereta digulu Sapit Menteri Besai, Datuk Seri Fadillah Yusof.
Bemacham achara manah diperambu dikena ngerichahka pengerami bejadi iya nya Mini Karnival Komuniti MADANI, eksibisyen, panggau pemerindang PENTARAMA, aktiviti interaktif peranak menua, Bejual Rahmah enggau ke bukai.
Helmy madah kelimpah ari nya pengerami Konvoi Kembara Jalur Gemilang (KMJG) renggat Sarawak mega deka diatur ba hari ke sama.
Iya madah, konvoi ke bela dipasuk Kaban Parlimen Puncak Borneo Willie Mongin begulai enggau urung 140 iku penyereta nuju ke Kampung Bratan ti nyadi palan keterubah pejalai taun tu.
“Udah nya, konvoi nya mega bejalai ke genap pelilih menua enggau bagi menua nyentuk ke Miri lalu sangkai di Sibu ke mega palan besai endur ngintu Hari Kebangsaan Renggat Sarawak 2024 kena 31 Ogos tu.
“Pengerami Hari Malaysia renggat nengeri deka diatur kena 16 Sept di Sri Aman,” ku iya.
Mensia mayuh ke bisi ati nyeretai program ke diatur sepanjai Bulan Kebangsaan ulih meda salur rasmi HKHM 2024 di www.merdeka360.my enggau media rama Facebook, Instagram, X enggau TikTok Merdeka360.-TVS
