KUCHING, 1 Ogos: Lambang enggau maskot SUKMA ke-21 Sarawak 2024 enda ulih dichelak sengapa enti nyema nadai pemendar ari raban pengatur.
Menteri Nembiak, Lumba Enggau Main Sereta Pemansang Pedagang Sarawak, Dato Sri Abdul Karim Rahman Hamzah nyemetak madahka, lambang enggau maskot nya udah direjista ba baruh Akta Hak Cipta 1987.
”Lambang enggau utai bukai enda ulih dichelak tauka dikena sengapa aja, enti nyema nadai pemendar diberi, bekaul enggau SUKMA sekalika lambang tauka maskot nya udah direjista ba baruh ‘copyright’.
“Nya alai, kitai ngarapka sida ke ba luar din, anang nyelak lambang dikena ngaga ‘merchandise’ diri empu sereta bulih penguntung ari pengawa baka nya.
“Enti sida nya ka bejual barang (nguna lambang/maskot) nya mesti minta pemendar ari pengatur program dulu,” ku iya.
Taja pia, Abdul Karim nyukung tangkup pengawa media ti betanggungjawap nyadi pantar bekunsika penerang ngaul SUKMA Sarawak 2024 sereta dikemendar nguna lambang enggau maskot ti enda ibuh minta pemendar,”ku iya.
Iya mansutka jaku nya rambau Aum Media Bejadika Festival Music Borneo Sonic ba Begunan Baitulmakmur, kemari.
”Aku pechaya ti ungkup media, sigi udah direjister, udah nya kami sigi nyukung pengawa media ke meri pengeludas senentang SUKMA sereta enda nagang sida.
“Laban media ti sida ngena lambang enggau maskot tu dipeda ulih mantu ngelakuka SUKMA.
“Aku meda pekara tu baka nya ke alai media enda ibuh minta pemendar, lebih agi ti media nya udah berejister, sida ulih ngena lambang nya,ku terang Abdul Karim.-TVS
