MIRI, 29 Julai: Projek Ngaga Jalai Besai Sarawak Sabah (SSLR) Renggat 1 ti ngaul pengawa ngaga jalai sepemanjai 76 kilometer (km) ari Lawas ke simpang Long Lopeng diatu udah nyapai 35 peratus.
Sapit Menteri Infrastruktur enggau Pemansang Penyangkai Kapal Sarawak, Datuk Aidel Lariwoo madahka pengawa ngaga projek nya dulu ari perambu keterubah iya nya lima peratus.
Projek ke digaga ngena agih belanja ari Perintah Besai ti beungkus RM1 bilion nya ngelui ari ti dipelaba, ku iya madah rambau aum media pengudah ngabas Projek Trans Borneo Highway (Miri) ditu, sehari tu tadi.
Iya mega ngarapka kunteriktor ke dipadu nya terus konsisten nembuka projek ke bukai dalam timpuh ke udah ditetapka.
Berebak enggau nya, ungkup projek SSLR 2 iya madahka kereja tumu ba palan nya udah berengkah lalu projek nya dipelaba tembu dalam timpuh lima taun.
Projek tu ngaul pengawa ngaga arung ti baru enggau dikena ngangkatmanah jalai seriris enggau standard R3 sepemanjai 322 kilometer ti deka nyambung jalai di Sarawak.
Endur tu nyengkaum menua Lawas ngagai menua Limbang sereta ngagai menua Mulu ti enda mansa menua Brunei llau projek tu nguna agih belanja ari Perintah Besai beungkus RM7.2 bilion .
Projek ti deka dipejalaika nengah empat pakej tu deka nyadi akses enggau mobiliti ti meri pemaik ngagai mensia mayuh lebih agi dikena bala temuai mindah enggau lantang sereta likun.
Ka penerang, Surat Setuju Nerima (SST) ungkup projek tu udah diberi Menteri Kereja Raya Datuk Seri Alexander Nanta Linggi ngagai kunteriktor kena 26 Mac 2024. – TVS
