PUTRAJAYA, 27 Julai: Yayasan Nagang Penyalah Malaysia (MCPF) enda setuju enggau bantah ari Suruhanjaya Hak Asasi Manusia Malaysia (Suhakam) bekaul enggau ukum mati ke diletak ungkup enam iku ex-nembiak Universiti Pertahanan Negara Malaysia (UPNM).
Sapit Chairman Kanan MCPF, Datuk Seri Ayub Yaakob nengah penerang berita sehari tu madah, akim ngembuan kuasa enggau budi bicara meri ukum nya taja pan perintah udah ngemunaska ukum mati mandatori ungkup kes bunuh enggau kes bedagangka dadah.
“Sekeda nengeri di Amerika Syarikat agi bejalaika ukum mati ngagai orang ke ngereja penyalah ketegal munuh orang. Malaysia enda ibuh nitihka budaya, undang-undang enggau pengawa menua barat ti belaban enggau norma pengidup mensia,” ku iya.
Dulu ari nya, Suhakam dalam siti penerang mantah ukum mati ti dipejalaika laban ukum nya ukai chara mutarka penanggul ke adil tauka efektif.
Ku Ayub madah, MCPF bepenemu ukum mati ti diberi Kort Apil ngagai enam iku ex nembiak UPNM ketegal munuh Pemesai Kadet Laut Zulfarhan Osman Zulkarnain tujuh taun ke udah, endang betul sereta patut.
Kelimpah ari nya, iya madahka ulah ti merinsaka orang nyentuk ke parai nya endang ngelaban norma pengidup mensia, kelebih agi pengawa nya dikereja orang ti bepelajar.
“Pengawa munuh mensia ke digaga piak ke nadai ati nya utai ke ditagang dalam Islam,” ku iya.
Hari Dua ke udah, Kort Apil nulak ukum jil 18 taun ti udah ditetapka Kort Tinggi ngagai enam iku orang ke dituduh nya lalu diganti enggau ukum gantung sampai mati.
Panel tiga akim Kort Apil ti betuaika Akim Datuk Hadhariah Syed Ismail dalam pemutus iya madahka akim Kort Tinggi nya bisi salah lebuh iya ngubah dawa asal ari Seksyen 302 Kanun Keseksaan iya nya munuh ngagai Seksyen 304 (a) Kanun Keseksaan.
Zulfarhan udah nadai ba Sepital Serdang kena 1 Jun 2017. -TVS
