KUCHING, 27 Julai: Kaunsil Asil Pengeraja Asal enggau Rampa Menua (NREB) Sarawak dipinta mantaika langkah rapat inovatif ba pengawa ngatur rampa menua.
Premier Sarawak, Datuk Patinggi Tan Sri Abang Johari Tun Openg madahka, perkara nya setipak enggau inisiatif Perintah Sarawak mekuhka pemansang gadung, pemeruan rampa menua serta nyimpan karbon.
Ku iya, NREB mega patut nyikap diri dikena ngatur semua pemansang enggau manah.
“Polisi enggau atur ti tegap nyadi tulang belakang pengawa ngatur rampa menua.
“Pengawa nya ukai semina nentuka pemansang ti efektif tang mega nyaga ekosistem asal kitai, nerenakka budaya meruan dalam sektor dagang enggau industri, kelimpah ngurangka empas ti enda manah ngagai rampa menua sereta nyeliahka penusah alam,” ku iya.
Iya mansutka jaku nya rambau bejadika Pengerami Ngintu Taun ke-30 NREB Sarawak ba Palan Konvensyen Borneo Kuching (BCCK), malam tadi.
Sama bisi datai, Sapit Premier Sarawak iya nya Datuk Amar Awang Tengah Ali Hasan enggau Datuk Amar Dr. Sim Kui Hian enggau Sapit Menteri Pengangkut (Udara enggau Jalai ) Sarawak, Datuk Dr. Jerip Susil enggau Sekretari Perintah Nengeri, Datuk Amar Mohamad Abu Bakar Marzuki.
Nangkan ke nya, Abang Johari mega muji pemujur NREB bejalaika Sistem Tisih Empas ba Rampa Menua (EIA) ti deka nentuka projek pemansang dipejalaika sechara betanggungjawap sereta menatika empas pemansang nya ngagai rampa menua.
“Pengawa baka tu ukai semina nyaga ekosistem asal, seraya nerenak budaya pemeruan rampa menua dalam sektor dagang enggau industri kitai,” ku iya.
Abang Johari madahka Sarawak udah bejalaika atur ti tegap sereta merambu macham strategi dikena mutarka pemar ke ditapi nyadi ketegal pemansut gis rumah gadung.
“Kampung ukai semina nyadi pemansang ekonomi dalam tukuh pengawa nebang kayu, ekodagang temuai enggau farmaseutikal tang mega meri pemaik rampa menua enggau ekonomi ke baru.
“(Kebuah pia laban) kampung nyerap gis karbon dioksida ari atmosfera, nyadi penyerap karbon sereta ngurangka agi ubah gaya hari,” ku iya.
Berebak enggau nya, Pengawal Kualiti Rampa Menua Sarawak NREB, Jack Liam mantaika pengawa Nusun Baru Organisasi enggau Peminta Tenaga Kerja udah dikemendarka Kunsil Mesyuarat Perintah Nengeri (MMKN) kena 28 Februari 2024.
“Pemendar nya beguna dikena nambahka kapasiti enggau pengulih NREB setipak enggau kangau Abang Johari.
“Sepenyampau 97 pangku pengawa udah dikemendarka lalu diisi dalam timpuh enam taun seraya ngemendarka kami ngembuan pengereja pengawa enggau perengkaguna ti diguna dikena ngatur pengawa bekaul enggau uras ti udah ditetapka sereta gis rumah gadung (GHG),” ku iya.
Ku iya nambah, pengawa tu mega mungkur pengawa numbuhka tiga bagi menua baru ba renggat opis enggau sebuah opis bagi menua di Kapit.
“Pengawa niki pangku pengawa bekaul tu dipejalaika ba kededua opis enggau opis bagi menua berengkah ari 1 Julai 2024.
“Pemujur tu asil ari Lembaga enggau iring (YAB) Premier ti chukup dipebasa,” ku iya . – TVS.
