SPAOH, 27 Julai: Opis Krafjari Malaysia Pampang Sarawak udah tu merambu numbuhka Komuniti Bejait Nyulam Baju Dabong ba Spaoh.
Direktor Opis Krafjari Malaysia Pampang Sarawak Mohd Fu’ad Ariffin madah perambu nya bepelasarka pengeransing dikembuan raban indu ba pelilih nya ke dipeda diatu.
“Beratika pengeransing bala penyereta sereta penau produk ke digaga kami ba Krafjari Malaysia deka nguji numbuhka Komiyi Bejait Nyulam Baju Gagong ditu (Spaoh) dibaruh Projek Pemansang Pengelandik Komuniti (PPKK) Baju Sulam iya nya Projek Baru PPKK di Sarawak ungkup taun 2025 ila,” ku iya.
Iya madah munyi nya nengah teks jaku iya ke dibacha Ismail Ibrahim ba Pengawa Nutup Kus enggau Nyuaka Setipikit NYyulam Baju Dabong ba Diwan Komuniti Spaoh, pagi tadi.
Ku tandu iya, Opis Krafjari Malaysia mega udah bejalaika sekeda inisiatif dikena ngelakuka Baju Dabong udah dipeda ngagai renggat ke lebih agi sekeda program ke diatur ngelama tu baka ngatur Pekit Ratu Dabong nyerumba Program Kraf Borneo di Bintulu empai lama.
Kelimpah ari nya, ku iya pengawa ngangkatka Baju Dabong tu deka diteruska nengah chara ngatur demontrasyen ba waterfront Kuching berengkah 25 Oktober nyentuk 3 Disember 2024.
Nangkan ke nya, Patrice Chendai Empaling iya nya siku pengajar nyulam baju Dabong madah, iya chukup gaga sereta muji perambu deka numbuhka industri ngaga baju dadong dikena mantu orang indu ba menua pesisir lebih agi di Bukit Saban.
“Kami beterima kasih ke penyiru Datuk Amar (Douglas Uggah Embas) laban udah mantu sereta meri peluang ngajar.
“Arapka raban orang atas bisi nyendiaka siti bantu dikena nambahka mayuh agi produk ungkup dijual ngagai luar ukai semina ba Spaoh, “ku iya.
Kus Nyulam Baju Dabong nya diatur berenggat ba 25 buah rumah panjai ba sitak DUN Bukit Saban lalu penyampau sida ke udah diajar ditu iya nya 256 iku (penyereta).-TVS
