KUCHING, 25 Julai: Raban pengereja pengawa, tebal agi di Sarawak dipinta nyaga reputasyen servis perintah sereta nentuka semua atur nitihka standard integriti ke pemadu tinggi.
Sapit Premier Sarawak, Datuk Amar Dr. Sim Kui Hian madahka Sarawak diatu komited deka nerenak budaya integriti dalam meri servis ngagai rayat sereta bibas ari penyalah makai suap.
Ku iya, asil ripot statistik Komisyen Nagang Penyalah Makai Suap Malaysia (SPRM) mantaika kes salah nguna kuasa, makai suap enggau kurang pengelurus diatu majak mayuh diripotka, tebal agi ngaul projek pemansang.
“Statistik SPRM ngayanka ba taun 2023, bisi 437 kes pengereja pengawa perintah ke ditan enggau dalam timpuh enam bulan keterubah taun 2024, 319 iku ditan.
“Engka ketegal SPRM nagit pengereja pengawa perintah aja? Nya aku enda nemu tang aku suah meratika mayuh ripot bekaul pengereja pengawa perintah ditangkap.
“Taja pan penyampau nya mit enti dibanding penyampau semua pengereja pengawa perintah di Malaysia, iya nya kira-kira 1.5 juta iku orang tang mesti nyaga reputasyen servis perintah sereta nentuka semua atur nitihka standard integriti betikas tinggi,” ku iya.
Dr Sim mansutka penemu nya rambau Pengerami Ngintu Hari Integriti Opis Menteri Pengerai Mensia Mayuh, Pengawa Berumah enggau Perintah Lokal Sarawak ba Wisma SABATI, ditu, kemari.
Dr Sim Ke Mega Menteri Pengerai Mensia Mayuh, Pengawa Berumah enggau Perintah Lokal Sarawak mega madahka senentang teknologi endang beguna amat dikena negapka pengelurus, lebih agi pemansang dalam transaksyen digital nyadi chara dikena ngurangka penyalah makai suap.
Ambika chunto, ku iya, perintah china bejalaika pengawa mayar sechara digital nyadi model dikena nentuka tetiap transaksyen iya nya lurus enggau ulih ditemu.
Dr sim mega ngemeratka pengelantang pekara wang Sarawak enggau pemesai guna ngetanka reputasyen nya dalam betapi pemansang ekonomi, kelimpah inisiatif besai ti dipejalaika baka kilang metanol di Bintulu ti dijangka deka nyungkak 3 bilion dolar Amerika ninting taun.-TVS
