KUCHING, 25 Julai: Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar ngembuan pengarap ngagai Yang Di-Pertua Dewan Negara, Datuk Awang Bemee Awang Ali Basah ulih mantu perintah besai neruska reformasyen Parlimen.
Iya mega ngarap Awang Bemee ti dichiri kena 22 Julai tu tadi ulih neruska atur ngemanahka mekanisme ‘semak dan imbang’ ti udah dipejalaika iya sebedau ngetu megai pangku pengawa nya pun taun tu tadi.
Dalam siti penerang, Tun Wan Junaidi madahka penyiri kedu Kaban Kunsil Nengeri (ADUN) Nangka nya dipeda senutuk enggau haribulan Sarawak merintah diri kenyau 61 taun ke udah.
“Aku deka nguna awak tu meri besai pengaga ati ngagai Yang di-Pertua Dewan Negara ti baru dichiri, Datuk Awang Bemee Awang Ali Basah.”
“Aku gaga meda Menteri Besai, Datuk Seri Anwar Ibrahim milih tuai ari Sarawak sekali agi ungkup dichalunka sereta disahka Kaban Diwan Negara mangku pengawa nya,”ku iya.
Ungkup rikod, Awang Bemee iya nya peranak Sarawak ti keempat mangku pengawa nya pengudah Tan Sri Datuk Amar Abang Ahmad Urai Abang Muhideen (1988 -1990), Tun Pehin Sri Dr Wan Junaidi Tuanku Jaafar (19 June 2023 – 19 Januari 2024) enggau Datuk Mutang Tagal (19 Februari 2024 – 10 Mei 2024).-TVS
