KUCHING, 24 Julai: Sarawak diatu sama peninggi enggau pengemeran industri metanol global, berindik ari penumbuh Kompleks Metanol Sarawak di Bintulu.
Inisiatif ti pemadu baru ari Perintah Sarawak ba baruh iring Premier Sarawak Datuk Patinggi Tan Sri Abang Johari Tun Openg nya ngayanka wilayah tu ulih nyadi endur ngemansangka aktiviti industri kompleks enggau besai.
Pengelicha Kanan Fakulti Ekonomi enggau Pengawa Dagang, Universiti Malaysia Sarawak (UNIMAS), Dr Dzul Hadzwan Husaini madah reformasyen landskap ekonomi baru nya ngujungka wilayah Sarawak, nyadi pilih menua luar endur meranakka puku.
Iya nerangka, serikat global diatu mekuhka pengawa meranakka puku ngagai pengawa ti nguna teknologi moden sereta nyaga pemeruan rampa menua, lalu Sarawak nyadi entara menua ke nyadi pengeluar.
“Pengawa meranakka puku ti bekualiti tinggi ukai semina nyukung ekonomi lokal, tang ngempung Sarawak ke dalam rentayan nilai global industri ti meruan.
“Kelimpah ari nya, projek tu deka meri empas ekonomi ti positif maya serikat menua luar meda pemujur projek besai di Sarawak, sida lalu deka meranakka puku dalam sektor ti dikembuan kitai, nguna manah infrastruktur sereta pemangkar ke benung ngerembai di Sarawak,”ku iya.
Iya bejaku munyi nya lebuh ditelefon pemberita TVS, empai lama.
Tandu iya, Projek Loji Metanol Sarawak deka nyamin puncha penatai pemisi baru, seraya nempa pemujur ti meruan ngagai rayat Sarawak enggau mega Malaysia.
“Nengah ngemayuhka puncha tauka sektor ekonomi nuju ngagai nempa pemansang sektor ekonomi besai baka tu, Sarawak deka ngurangka pengawa kelalu bepanggai ba industri minyak enggau gis sereta sektor elekterik enggau elektronik,”ku iya.
Iya andal projek nya deka meri empas ekonomi ti positif ngagai wilayah tu, kelimpah matak pemeranak puku sereta ulih nyadi penyungkak pemansang ekonomi ungkup timpuh ke panjai.-TVS
