SHAH ALAM, 24 Julai: Perintah deka numbuhka kus setipikit fisioterapi dalam program Pelajar Teknikal enggau Latih Vokasional (TVET).
Sapit Menteri Besai, Datuk Seri Dr Ahmad Zahid Hamidi madahka, chara nya ulih dikena nyemelaka pakar fisioterapi enggau penyampau rayat ba menua tu.
Ku iya madah, taka banding raban fisioterapi di Malaysia ungkup 7,400 iku rayat enti dibanding enggau menua maju ke bukai.
“Ba menua maju, siku fisioterapi ungkup 2,000 rayat.
“Dalam menua tu, siku raban fisioterapi ungkup 7,400 iku perayat.
“Nya alai, tu nyadi timpuh panjai ke patut dikenatika sistem TVET,” ku iya madah ngagai pemberita pengudah bejadika Palan Fisioterapi enggau Rehabilitasyen Lumba enggau Main ProPain ba Seksyen 13, Hari Dua tu tadi.
Ahmad Zahid ke mega Chairman Kaunsil TVET Menua nerangka, kus fisioterapi bisi disediaka ba kolej enggau universiti nengah fakulti perubat enggau pengerai ba renggat Diploma.
Berebak enggau nya, iya madahka, kus setipikit ba renggat baruh ulih disediaka nengah sekeda institusyen TVET ti deka dipadahka udah tu.
Tandu iya, ba renggat pemun, kus nya deka meri latih pelasar nengah Setipikit Pengelandik Malaysia (SKM) ungkup tikas 1 enggau 2.
“Laban menua kitai tu begunaka fisioterapi ke mayuh, nya alai tu bidang ke mudah diambi ke enda ibuh nengah sistem akademik biasa,” ku iya madah.-TVS
