KUALA LUMPUR, 24 Julai: Penyampau kes kumulatif penyakit bekaul enggau gaya hari angat nambah ngagai 112 kes naka ke diatu ti dibanding enggau 109 kes kena 16 Julai tu tadi.
Nitihka ripot ari Agensi Pengatur Penusah Ngenyit Menua (NADMA) Hari Dua madahka, ari penyampau nya, 26 kes strok ketegal pengangat hari, 78 kes unggui ketegal pengangat hari sereta lapan kes lelak ketegal pengangat hari.
Nadai kes pemati baru diripotka dalam minggu tu tadi, lalu enggau nya penyampau semua kes pemati ketegal pengangat hari mengkang lima kes.
“Nadai kes ti diperubat ba sepital naka diatu. Semua kes bukai udah berubat sereta gerai,” ku NADMA.
Bekaul enggau pelaba gaya hari, dua puting beliung tropika dalam kategori taifun enggau ribut tropika benung nyadi tunga timur laut Filipina enggau Tasik Besai China Selatan ke ngujungka gaya hari ba rantau menua nya lebih rangkai sereta kurang napi ujan dalam timpuh beberapa hari ti ka datai.
Nitihka ripot nya, bepelasarka analisis model gaya hari, semua penusah nya dipelaba deka pulai normal enti nyema puting beliung tropika nya nyau kurang nyadi berengkah 27 Julai. – TVS
