SARATOK, 24 Julai: Raban Penyanga Penusah Nengeri Pelilih (JPBD) Saratok deka terus matau pasal pengerekai penyakit Acute Gastroenteritis (AGE) tauka sakit perut chirit di pelilih nya.
Chairman JPBD Saratok Mohd Dino Amid madah, atur mutar timpuh pandak enggau panjai dikena mutar penyakit nya ari terus ngerekai terus chakah dipejalaika.
“Kitai udah mendingka ripot ari Opis Pengerai Bagi Menua enggau ejensi besai iya nya Opis Bekal Ai Menua Pesisir sereta ejensi bekaul.
“Kami mega udah bejalaika atur ungkup timpuh pandak engga panjai dikena mutarka pengerekai penyakit tu.
“Puji Tuhan asil penerang ari Opis Pengerai Bagi Menua madahka rikod kes AGE tu udah nurun tang kitai deka terus bejalaika pengawa matau nengah JPBD,” ku iya.
Iya mansutka penemu nya maya dirandau TVS pengudah tembu aum pasal penyakit Acute Gastroenteritis (AGE) ba Opis Pelilih Saratok, Hari Dua.
Ku iya, pemutus aum mega setuju ngambika raban JBALB Betong bejalaika pengawa matau belanggang ngagai semua loji ai beresi di Saratok nyengkaum tangki ai ba sekula ke bisi tekeruga.
Berebak enggau nya, Mohd Dino ngelalau mensia mayuh di Saratok anang irau pasal pekara nya laban agi ulih jaga sereta diatu mandangka rikod kes ke nurun.
Sebedau tu, raban Unit Emejensi enggau Trauma (ECU) Sepital Saratok tekenyit meda penatai raban nembiak ari sekeda sekula enggau peranak ke diau besemak nganjung diri berubat ketegal sakit perut, mutah, bira chirit lalu ngujungka raban bekaul terus bejalaika atur nyekat pengerekai penyakit nya.
Naka tu bisi 434 kes penyakit AGE dirikodka di pelilih Saratok.- TVS
