KUALA LUMPUR, 24 Julai: Pengawa numbuhka kompleks metanol Sarawak Petchem Sdn Bhd ke beungkus RM7 bilion nyadi pemujur ti beguna dikena mantu Malaysia nyadi pengeluar besai metanol di rantau Asia Pasifik, ku Menteri Meranak Puku, Dagang enggau Industri, Tengku Datuk Seri Zafrul Abdul Aziz.
“Nya ukai semina ngemansangka Malaysia dalam industri kimia baka ke udah dipadahka ba baruh Langgur Kuing Tuju Industri Kimia 2030 (CIR 2030), nya mega nyendiaka peluang gawa sereta meransang ekonomi Malaysia nengah chara meri peluang ngagai industri dagang mit enggau sedang,” ku iya madah dalam penerang ti dikeluarka Kaunsil Pemansang Lembaga Meranak Puku Malaysia (MIDA) Hari Dua tu tadi.
Berebak enggau nya, Tuai Pemesai Eksekutif MIDA Sikh Shamsul Ibrahim Sikh Abdul Majid madahka, pemujur ke dijapai Sarawak Petchem nya ngayanka menua Malaysia nyadi palan ti nemban alai beranakka puku skala besai sereta meri empas ti tinggi.
“Semua tu pemungkal… dalam Pelin Besai Industri Baru (NIMP) 2030 enggau CIR 2030, kami komited deka nyungkak penambah produk ti meri empas ke tinggi sereta ngemayuhka produk ti berega tinggi seraya deka meransang penumbuh ekonomi Malaysia ,” ku iya madah.
Iya nerangka, projek nya meransang agi penumbuh enggau pengawa meranak puku ba rantau tu sereta meri jamin MIDA deka terus nyendiaka perengkaguna ti diguna Sarawak Petchem dikena nangkup juluk kompeni nya nyadi entiti ti tebilang dalam industri petrokimia dunya.
Chairman Petchem Sarawak, Tan Sri Dr Abdul Aziz Husain madahka, projek nya deka matak mayuh agi pemansang ekonomi ba rantau tu, muka peluang gawa, nerenak penumbuh ti meruan sereta ngangkatka Sarawak sechara strategik nyadi pemekuh besai dalam industri petrokimia global.
“Penumbuh Sarawak Petchem mega nyendiaka pantar dikena Sarawak mansang sereta matak pengereja pengawa bepengelandik datai gawa di Sarawak sereta sekeda rayat Sarawak mupuk pulai gawa di Sarawak Petchem besaup nembuka projek tu,” terang iya.
Nangkan ke nya, MIDA madahka kompleks metanol Sarawak Petchem ti dilancharka di Tanjung Kidurong, Bintulu tu dikearapka ulih matak mayuh agi pemeranak puku enggau industri ili.
Tandu iya, projek ti ngeluarka kapasiti 1.75 juta tan ninting taun nya deka negapka penuduk kompeni nya nyadi pengeluar metanol kedua pemadu besai di Malaysia pengudah Petronas Chemicals Group Bhd.
Metanol mega nyadi kereban mata kritikal dikena ngasilka kereban kimia baka asid asetik enggau formaldehid, ti beguna dalam industri nyengkaum pemelekat, petaku enggau ‘foam’ (busa).
MIDA madahka, kompleks metanol nya sebagi ari juluk perintah nengeri Sarawak ti deka ngemansangka Bintulu nyadi hab petrokimia di wilayah tu.
Kilang nya deka begunaka pengereja pengawa ti bepengelandik baka injinir, juruteknik, operator enggau tebangkar ngemataka operasyen lalu bisi mega peluang bukai ari operasyen kilang nya nyengkaum servis enggau pengawa nyeruri.
MIDA madahka, Malaysia nyadi tuai rumah industri petrokimia ti mungkur lebih 100 buah kompeni ti ngaga mayuh macham rentayan produk kimia.
Ku iya madah, pengawa meranak puku ari menua luar di Malaysia udah nambah dalam beberapa dekad ke udah ketegal akses iya ba dalam asil pengeraja asal baka minyak enggau gis, infrastruktur ke luas, sektor servis ke tegap sereta geografi ke strategik dike nangkup peminta makit di Asia enggau Timur Tengah.
“Pengeluar petrokimia Malaysia diatu numpu ngagai olefin, polimer enggau aromatik enggau perambu ti tinggi deka mansang ngagai industri kimia,” tandu iya. -TVS
