BINTULU, 23 Julai: Sarawak enda ngelepaska hak diri empu taja nyadi bakih kunsi dalam penumbuh Perintah Malaysia, ku Premier Sarawak Datuk Patinggi Tan Sri Abang Johari Tun Openg.
Ku iya, semua hak ke udah dipekat bepelasarka undang-undang Sarawak sebedau penumbuh Malaysia deka mengkang diguna nyema nadai ubah ba parlimen nengah pemendar Kunsil Nengeri Sarawak.
“Ambika chunto, gerah ke udah digaga Ratu Elizabeth tauka Order in Council ba taun 1954 bekaul enggau adan menua Sarawak nerangka iya nya adan menua tasik Sarawak dikerembai nyentuk ke pantar menua nyengkaum lansar tasik enggau baruh lansar tasik.
“Tu antara hak-hak ke dibai Sarawak maya berakup enggau gempung Tanah Melayu, Sabah enggau Singapore kena 16 september 1963 lalu enda ulih diserah ngagai orang bukai.
“Tu endang antara pekara ti enda ulih dirunding baka ke suah disebut aku sebedau tu,” ku iya lebuh bejaku ba Pengerami Ngintu Hari Sarawak ditu malam tadi.
Tandu iya, Kunstitusyen Perintah Besai mega ngaku iya nya wilayah ba genap nengeri di Malaysia endang baka sebedau Hari Malaysia, 16 September 1963.
Sebarang undang-undang ke digaga lalu ngubah adan nengeri enda ulih dikemendar enti nadai setuju ari nengeri ke bekaul.
Ku iya, tu negapka agi penemu kitai pasal pekara bekaul enggau adan menua tu ukai utai ungkup diperunding.
“Chunto kedua iya nya bekaul enggau Kanun Tanah Sarawak, berengkah dikena dalam taun 1958 ti meri kuasa penuh ngagai Sarawak ngatur sebarang pekara ba tanah Sarawak ti nyengkaum pengeraja ba pantar benua, ba lansar tasik enggau baruh lansar tasik nyengkaum aktiviti nyimpan karbon tauka CCUS, ” ku iya.
Berebak enggau nya, hak undang-undang bekaul enggau tanah mega ditukuka ari baruh kuasa nengeri tu nengah Rintai Kedua, Jadual Kesembilan, Konstitusyen Perintah Besai.
Nangkan ke nya, nyentuk ke diatu Kanun Tanah Negara enda dikena di Sarawak laban Sarawak udah bisi undang-undang tanah ke udah bisi lalu terus dikena pengudah Malaysia ditumbuhka. – TVS
