ROBAN, 23 Julai: Kaban Kunsil Nengeri (ADUN) Kalaka Mohd Duri madah diri udah setuju ngagihka bantu tumu nengah agih Projek Mit Menua Pesisir (MRP) enggau Program Ngangkatmanah Rumah Seranta Sarawak (PPRMS) dikena mantu siku penanyi lama Iban, James Ming ke balat seranta.
Ku iya, antara bantu dikena ngelempung penusah James Ming iya nya ngaga ke sebuah bilik mandi enggau agu ke lebih menyana ungkup pengelantang tudah udah tu.
“Dikena ngelempungka tating penusah James Ming dalam perambu ke udah diperunding kitai enggau Tuai Rumah Luna tadi, kitai deka mantu ngaga sebuah bilik mandi enggau agu dalam rumah iya nengah bantu MRP PPRMS ke suah diberi EPU ngagai tetiap ADUN enggau dikena mutarka penanggul Encik James Ming,” ku iya.
Iya mansutka jaku timbal nya rambau penemuai ngagai Rumah Panjai Luna ke mega Rumah James Ming di Nyiar Roban kemari.
Ku iya, raban Gerempung Volunteer Bagi Menua Betong mega deka ngatur penemuai ninting minggu ngabas James Ming dikena ngemujurka pengawa ngatur bantu nya.
“Kitai udah berandau enggau raban Gerempung Volunteer Bagi Menua Betong dikena bejalaika pengawa penemuai empat kali dalam sebulan ninting minggu enggau pengawa nya suah dipejalai Gerempung Volunteer Bagi Menua Betong ngagai orang lunggar umur ti begunaka bantu di genturung pendiau di Saratok,” ku tandu iya.-TVS
