KALA tebilang enggau lagu ‘Dini Nuan Sigi Aku Gagai’ urung lapan taun ke udah, James Ming tauka nama asal Minggu Bueng ti diatu semina bepanggai ba kerusi roda dikena mindah.
James Ming ke beumur 54 taun ari Rumah Panjai Luna Nyiar Roban madahka, bekau ari penusah aksiden ti kala nuntung ngujungka pengidup iya berubah seratus peratus.
“Maya nya suba endang sigi chukup suntuk (belanja) lalu begiga ke upa enggau buah maram kami duai menyadi aku.
“Udah nya tadi, kira pukul 2 (ngalihari) datai ba menua Tebarong lalu kena lantak (kerita) orang kami duai.
“Aku enda nemu kebuah kaki aku tu enda nemu engkebut tu suba.
“Udah nya, masuk sepital Sarikei kira seminggu enda ulih ubat dia anjung ke Sibu datai din enda memukai ga sakit datai entudi ga masuk bilik ICU, kumbai enda nyadi mensia mih aku.
“Maya nya suba bisi seminggu nadai nemu orang (koma),” ku iya nusui kisah pengidup diri ngagai raban media.
Iya mansutka jaku nya rambau dirandau pengudah penemuai Kaban Kunsil Nengeri (ADUN) Kalaka Mohd Duri enggau raban ejensi perintah kemari.
Ari lubok ati ti dalam James Ming endang ngarap amat bisi raban ‘gerah jari’ datai mantu nembuka rumah iya ti agi tejanggal nyentuk ke diatu.
“Kesatu aku tu enda ulih bejalai agi baka suba.
“Naka nya mih utai ulih digaga aku.
“Nya alai diatu minta ampun ngagai kita enti jaku nyau kelalu tak minta tulung orang mih aku ngaga rumah tu,” ku iya.
Kelimpah ari nya, iya ngarap bantu ninting bulan sepenyampau RM200 ari Opis Pengintu Pengelantang Raban Bansa (JKM) jam ke diatu ulih ditikika agi.
Tuju tu dikena nampung ungkus iya nganjung diri berubat ngagai Sepital Saratok beduduk ari tambang kereban pengangkut ke udah niki.
James Ming kala dituntung penusah aksiden ba jalai alun taun 2019, maya iya dalam pejalai deka nyual buah maram begulai enggau menyadi iya.
Penusah nya ngujung ke iya ngelengka karier nyadi siku penanyi ti sebagi ari juluk ati iya kenyau ari mit.
James Ming ditepan sekeda penyakit raya baka penanggul tungkul sengayuh enggau kemi manis.-TVS
