KUCHING, 23 Julai: Asil pengeransing belajar sigi enda kala ngelebu, ku Alya Athirah Asfia, siku nembiak ke nyulut ba peresa Sijil Tinggi Pelajaran Malaysia (STPM) 2023 pengudah bulih pemutus Purata Nilai Gred Keseluruhan (PNGK) 4.00.
Taja ba semester dua nyau deka putus pengarap, tang Alya naka ulih angkat baru lalu ngubah runding sereta ngeransing diri belajar ninting hari enggau dani tengah malam.
“Kunchi pemujur iya nya mansal diri belajar ninting hari taja pan kadang-kadang berasai lembau, enti lembau belelak enda lama.
“Kebendar, aku tekenyit laban bulih PNGK 4.00, saran aku semina 3.50 ke atas aja,” ku iya madah ngagai pemberita sepengudah pengawa mantaika pemutus peresa STPM ba Opis Pelajar Nengeri Sarawak ditu, sehari tu tadi.
Ku terang Alya, iya bisi ati deka nampung pelajar ba tikas Ijazah Sarjana Muda dalam bidang sejarah di Universiti Malaya.
Nangkan ke nya, Bryan Tan Jun Liang ke mega mujur bulih PNGK 4.00 madahka subjek Kesusasteraan Melayu Komunikatif nyadi pemar besai ngagai iya bebendar agi nguasa subjek nya.
“Enti bisi utai enda ditemu, aku ngiga pengajar alai aku betanya nyentuk aku mereti ke (subjek) nya. Ba semester tiga, bekau ari pengeransing pengawa aku udah ngenataika asil pemutus peresa ke manah,” ku iya enggau ati gaga.
Ku Bryan, ketegal pengerindu ti dalam ba bidang pekara wang, iya milih Universiti Malaysia Sarawak nyadi pilih keterubah alai iya nampung pelajar.
Di Sarawak, Direktor Opis Pelajar Nengeri, Datuk Dr Azhar Ahmad madahka bisi 88 iku chalun bulih PNGK 4.00 lalu 1,910 iku chalun teulihka PNGK 3.00 ngagai 3.99.
Kelimpah ari nya, siku agi nembiak pemadu nyulut iya nya Muhammad Nazif Adham Ahmadie dalam kategori nyelai pendiau ke mega mujur bulih PNGK 4.00 udah dikangau nerima anugerah ba Majlis Peperiksaan Malaysia sehari tu tadi.-TVS
