KUCHING, 22 Julai: Perintah Sarawak diatu deka nentuka penatai pemisi ruang bilik ulih betambah, ku Sapit Premier Sarawak Datuk Amar Awang Tengah Ali Hasan.
Ku iya madah, pekara nya seriris enggau pengangkun Sarawak nyadi menua bepenatai pemisi tinggi baka ke udah diaku Bank Dunya ba taun 2023 enggau 2024.
“Berebak enggau nya, bemacham inisiatif benung deka dipejalaika seriris enggau strategi pemansang baka ti udah disebut dalam Strategi Pemansang Pasca Covid-19 (PCDS) 2030.
“Entara nya ngemeratka pelajar enggau pengelandik. Tu setipak enggau polisi kitai ti deka ngemansangka sumber mensia nengah pemansang bakat,” ku iya.
Iya madah munyi nya nengah jaku ti dirikod beserimbai enggau pengerami Hari Sarawak ti dikeluarka Unit Komunikasyen Mensia Mayuh Sarawak.
Awang Tengah mega minta rayat Sarawak terus chakah enggau perintah ti betuaika Premier Sarawak Datuk Patinggi Tan Sri Abang Johari Tun Openg dikena nentuka Sarawak deka terus mansang ke mua.
Iya madahka pemansang sumber manusia beguna amat lebuh pelilih menua tu fokus ngagai pemansang ekonomi digital, ekonomi gadung, ekonomi sekular enggau ekonomi bepelasarka teknologi tinggi.
“Aram kitai sama ngerapitka kaul enggau runding dikena ngemujurka visyen enggau misyen perintah ngemansangka Sarawak sereta ngangkatka pengelantang rayat.”
“Ngarapka Sarawak terus mansang, lantang, likun lalu rayat diau dalam pengelantang,” ku iya.
Nangkan ke nya, Pengerami Ngintu Hari Sarawak taun tu ti berambaika jaku “Sarawak Maju Sejahtera” diatur ba Bintulu malam tulalu deka dipancharka terus nengah TVS.
Pengerami ba palan Padang Bilun Lama Bintulu deka dirichahka enggau penatai Tuai Pemegai Menua Nengeri Sarawak,Tun Pehin Sri Dr Wan Junaidi Tuanku Jaafar enggau bini iya, Toh Puan Fauziah Mohd Sanusi sereta Premier Sarawak, Datuk Patinggi Tan Sri Abang Johari Tun Openg enggau bini iya, Puan Sri Datuk Amar Juma’ani Tun Tuanku Bujang. -TVS
