SPAOH, 22 Julai: Kaban Parlimen (MP) Betong, Dr Richard Rapu madah diri andal isu sekula repuk ba Betong ulih teputar iya nya abis laun taun baru.
Ku iya, pekara nya bepanggai ngagai Opis Kereja Raya (JKR) ke nyadi ejensi pengereja pengawa dalam nentuka genap projek ke bekaul enggau sekula repuk ba Betong ulih ditembu nitih timpuh ke udah ditaga.
“Ba Parlimen Betong tu dikearapka kitai lalu nya mega bepanggai ngagai ejensi pengereja pengawa baka ke ditemu sistem tinda baka ke nyadi ba SK Paku Central, siti kunteriktor sida diberi tiga sekula ke bebida endur.
“Nyadi tu chukup pedis enti nitih siti sekula diberi ngagai siti kunteriktor, nyadi senang deka matau lalu kunteriktor mega ulih nembuka (projek) dalam timpuh ke udah diberi,” ku iya.
Iya mansutka penemu nya maya nangguhka Pesta Buntal Bagi Menua Betong 2024 di Diwan Sri Saribas Kampung Manggut, Spaoh kemari.
Iya mega ngarapka raban JKR jera lalu nadai nandu pengilap sebedau tu ti ngujungka siti kunteriktor diberi lebih ari siti projek ungkup timpuh ke sebaka.
Ungkup rikod, bisi 12 buah sekula ba sitak Parlimen Betong dikategorika sekula repuk laludeka dikemanah ngaul bemacham perengkaguna baka Kolej Vokasional Betong, SMK Spaoh, SK Paku Central, SK Medang, SK Nanga Gayau, SMK Saribas, SK Nanga Lawih/Lesu, SK Spaoh, SK Sebemban, SK Nanga Ajau, SK Nanga Saka, enggau SK Datuk Bandar Debak.
Ari penyampa nya, tiga buah sekula udah tembu penuh lalu ke bukai agi benung diatur.-TVS
