KUALA LUMPUR, 22 Julai: Datuk Awang Bemee Awang Ali Basah nerangka pengawa nyiri iya nyadi Yang di-Pertua Dewan Negara sehari tu chukup besai reti laban nya seninjik enggau ngintu Hari Sarawak.
Ex Kaban Kunsil Nengeri (ADUN) Nangka nya madah, kena 22 Julai (1963), Sarawak dilepaska ari pegai kolonial lalu berengkah merintah nengeri kediri.
Yang di-Pertua Dewan Negara ke-21 nya nambah, kena 16 September, Sarawak begulai enggau Sabah sereta Persekutuan Tanah Melayu setuju numbuhka Persekutuan Malaysia ari baruh Sempekat Malaysia 1963 (MA63).
“Aku ngarika Kaban Dewan Negara, deka meri Selamat Hari Sarawak ngagai semua peranak Sarawak lalu kitai besampi ngambika (wilayah tu) terus maju sereta lantang.
“Enggau pemendar, jaku Iban, ulih mimit – mimit, terima kasih mayuh – mayuh,” ku iya sepengudah ngangkat sumpah sehari tu tadi.
Berebak enggau nya, Menteri Besai, Datuk Seri Anwar Ibrahim ba pun aum nya merambu Awang Bemee nyadi chalun tunggal ti deka dipadu mangku pengawa nya lalu disukung Menteri ba Opis Besai ( Undang-Undang enggau Reformasyen Institusyen), Datuk Seri Azalina Othman Said.
Sapit Yang di-Pertua Dewan Negara, Datuk Nur Jazlan Mohamed udah nya madahka Awang Bemee nyadi Yang di-Pertua Dewan Negara.
Awang Bemee ti dipadu nyadi senator kena 15 Julai tu tadi mega meri pengaga ati ngagai Premier Sarawak, Datuk Patinggi Tan Sri Abang Johari Tun Openg laban udah meri pengandal enggau berekat ngagai iya dipilih nyadi senator sereta nama iya dianjung ngagai Menteri Besai ngambika iya dichalun nyadi Yang di-Pertua Dewan Negara.
“Terima kasih (mega) ngagai semua kaban Dewan Negara laban nadai merambu nama bukai,” ku iya.
Awang Bemee mega besemaya deka neruska legasi transformasyen ti dipejalaika ex Yang di- Pertua Dewan Negara, Datuk Mutang Tagal.
“Aku deka bejalaika tanggungpengawa enggau lurus ungkup penyulut enggau pengelantang menua Malaysia,” ku iya.
Iya mega minta Kaban Dewan Negara meri pemeri ba pelilih menua tauka nengeri dikena nyapai penyulut dalam pengawa dagang, industri, betanam betupi, main asal enggau servis rama.
Pangku pengawa nya sebedau tu puang pengudah niang Mutang midang kena 10 Mei ba Institut Jantung Negara.
Sidang dewan mega diau jenuh seminit dikena ngingat sereta besampika semengat niang Mutang.
Awang Bemee ke mega ex ADUN Nangka pengelama tiga penggal, nyadi anak Sarawak keempat megai pangku pengawa nya pengudah Tan Sri Datuk Amar Abang Ahmad Urai Abang Muhideen (1988-1990), Tun Pehin Sri Dr Wan Junaidi Tuanku Jaafar (19 Jun 2023 – 19 Januari 2024) enggau niang Datuk Mutang Tagal. -TVS
